Qazaqstannyń birqatar oblystarynda 23 maýsym kúni tótenshe joǵary órt qaýiptiligi saqtalady
ASTANA. 22 maýsym. QazAqparat - 23 maýsym kúni Qazaqstannyń kóptegen aýmaǵynda aýa raıynyń turaqsyz sıpaty saqtalady, atmosferalyq frontaldyq aǵymdardyń ótýimen jaýyn-shashyn jaýyp, naızaǵaı jarqyldaıdy, ekpindi jel bolady,
dep habarlaıdy Qazgıdrometke silteme jasaǵan TJM-niń baspasóz qyzmetinen.
Shyǵys Qazaqstan, Jambyl, Mańǵystaý, Atyraý, Aqtóbe, Qostanaı, Qyzylorda, Ońtústik Qazaqstan, kúndiz Pavlodar, Soltústik Qazaqstan, Batys Qazaqstan oblystarynda keıbir jerlerde jel 15-20 m/s jyldamdyqpen soǵady.
Túnde Soltústik Qazaqstan oblysynyń keıbir jerinde jańbyr jaýady.
Respýblıkanyń ońtústik-shyǵysynda, soltústiginde, ortalyǵynda kún qatty ysıdy.
Jaqyn úsh táýlikte Almaty oblysynyń taýly ózenderinde temperatýralyq fonnyń kóterilýine baılanysty sý deńgeıiniń kóterilýi kútiledi. Qazaqstannyń ońtústigi men shyǵysyndaǵy taýly ózenderde sý deńgeıiniń aýytqýlary baıqalady.
Buryn habarlanǵandaı, 23 maýsym kúni Almaty, Qaraǵandy oblystarynda kún keıbir jerlerde 40 gradýsqa deıin ysıdy. 23 maýsym kúni kúndiz Aqmola, Qostanaı, Soltústik Qazaqstan, Pavlodar, Shyǵys Qazaqstan oblystarynda aýanyń temperatýrasy 30-35 gradýs, keıbir jerlerde 38 gradýs ystyqty kórsetedi.
