Qazaqstannyń birqatar qalalarynda jas mýzykant Erjan Qulybaevtyń kontsertteri ótedi

Kontsertter 17 qańtarda Almatyda - Jambyl atyndaǵy Qazaq memlekettik fılarmonııasynda bastalady. Budan keıin týrne 20 qańtarda - Qaraǵandyda «Shalqma» kontsert zalynda, 23 qańtarda - Astanada Óner ýnıversıtetiniń organ zalynda ótedi. Onda I.Bramstyń orkestr men skıpkaǵa arnalǵan kontserti oryndalady.

Al 25-30 qańtar aralyǵynda Kókshetaý, Petropavl, Astana qalalarynda ótetin kontsertterde A.Vıvaldıdiń «Jyl mezgilderi», A.Pıatstsollanyń «Býenos-Aırestegi jyl mezgilderi» shyǵarmalary oryndalmaq.

Kontsertterge QR Memlekettik akademııalyq sımfonııalyq orkestri, Q.Baıjanov atyndaǵy kontsert birlestiginiń Qaraǵandy sımfonııalyq orkestri, Astana, Kókshetaý jáne Petropavl qalalarynyń fılarmonııalyq orkestrleri qatysady.

Erjan Qulybaev alty jasynda Almatydaǵy Kúlásh Baıseıitova atyndaǵy daryndy balalarǵa arnalǵan respýblıkalyq arnaıy mýzyka mektebine túsip, professor N.M.Patrýshevadan dáris aldy. On eki jasynda Chaıkovskıı atyndaǵy Máskeý memlekettik konservatorııasy janyndaǵy ortalyq arnaýly mýzyka mektebinde pedagog A.V.Revıchten, Madrıdte Sofııa Patshaıymnyń joǵary mýzyka mektebinde professor Zahar Bronnan tálim aldy, sondaı-aq Glınka atyndaǵy Novosibir memlekettik konservatorııasynda magıstratýrada oqydy.

Ol bes halyqaralyq konkýrsta birinshi oryndy ıelendi. 2011 jyly Genrı Venıavskıı atyndaǵy Poznanda ótken skrıpkashylardyń on tórtinshi halyqaralyq konkýrsynda laýreat atandy.