Qazaqstannyń birqatar aımaǵynda 30 gradýs aıaz bolady dep kútilýde
ASTANA. QazAqparat - QR ІІM Tótenshe jaǵdaılar boıynsha komıteti birqatar oblystarǵa eskertý jasady.
«7-8 qańtarda BQO, Atyraý oblystarynda qar jaýyp, boran soǵyp, soltústik-batystan soqqan jel jyldamdyǵy 15-20 m/s jetýi múmkin. 8-9 qańtarda túnde aýa temperatýrasy 15-20, keı jerlerde 23-28 gradýs aıazǵa tómendeýi yqtımal», - delingen habarlamada.
8-9 qańtarda Qostanaı, Aqtóbe, Aqmola, Pavlodar, SQO, 9 qańtarda ShQO-da qar jaýyp, burqasyn bolady. Ońtústik-batystan, soltústik-batystan soqqan jel jyldamdyǵy 15-20, keı jerlerde 23-28 m/s-qa jetedi. Synap baǵanasy 9 qańtarda Qostanaı, Aqtóbe, 10 qańtarda Aqmola, Pavlodar, Soltústik Qazaqstan, Qaraǵandy, 11 qańtarda Shyǵys Qazaqstan oblystarynda túnde 23-28, keı jerlerde 33 aıazǵa deıin tómendeýi múmkin.
8 qańtarda Qyzylorda oblysynda jaýyn-shashyn (qarǵa ulasqan jańbyr), tuman, 9 qańtarda keı jerlerde qar jaýyp, boran soǵyp, kóktaıǵaq bolady dep boljanýda. Jel ońtústik-batystan, keıin soltústik-batystan soǵyp, jyldamdyǵy 15-20 m/s jetedi. 9 qańtarda aýa temperatýrasy túnde 3-8, keı jerlerde 13-18 gradýs aıazǵa deıin tómendeıdi.
9 qańtarda OQO, Almaty, Jambyl oblystarynda jaýyn-shashyn (qarǵa ulasqan jańbyr), tuman, kóktaıǵaq bolady. Jel ońtústik-batystan, keıin soltústik-batystan soǵady. Onyń jyldamdyǵy sekýndyna 15-20, keı jerlerde 23-28 metrdi quramaq. 10 qańtarda synap baǵanasy túnde 3-8, keı jerlerde 13-18 gradýs aıazdy kórsetedi.
