Qazaqstannyń birqatar áýejaılary ózderiniń shyǵyndaryn tipti 2030 jylǵa qaraı da jaba almaıdy - AMG
ASTANA. QazAqparat - Qazaqstannyń keıbir áýejaılary 2030 jylǵa qaraı da jolaýshylar aǵynynyń az bolýy sebebinen ózderiniń shyǵyndaryn jaba almaıdy. Bul týraly «QazAqparat» Halyqaralyq aqparat agenttiginiń resmı saýalyna qaıtarǵan jaýabynda «Airport Management Group» (AMG) JShS habarlady.
«Áýejaılar ózderiniń operatsııalyq shyǵyndaryn jabýy úshin jylyna keminde 200 myń jolaýshylar aǵyny bolýy tıis. Áýejaılar jelisin damytý boljamyna sáıkes Kókshetaý, Petropavl jáne Semeı sııaqty birqatar óńirlik áýejaılar tipti 2030 jylǵa qaraı da osy deńgeıge jete almaıdy», - dep áńgimeledi QazAqparatqa AMG-da.
Kompanııanyń málimetteri boıynsha 2014 jyly Astana áýejaıy 3 mln. jolaýshyǵa qyzmet kórsetken, Shymkent áýejaıynda ótken jyly jolaýshylar aǵyny 440 myń adamdy qurady. Qostanaı qalasynyń áýejaıyna jyldyq jolaýshylar aǵyny - 120 myń, Qyzylordada - 167 myń, Kókshetaýda - 19 myń jáne Petropavlda -17 myń jolaýshyny qurady.
AMG atap ótýinshe, álemdik tájirıbede halyqtyń áleýmettik jumylýyn qamtamasyz etýge óńirlik áýejaılardy jumysqa qabiletti jaǵdaıda ustap turý, sondaı-aq eldiń ekonomıkalyq belsendiligine óńirlerdi tartý jáne jahandyq ekonomıka úshin qajet, sondyqtan da bul mindetti jáne avıabaǵyttardy sýbsıdııalaýdy memleket óz moınyna alady. Qoldaýdyń bul sharalary árqashanda bir mezgilde qoldanylady.
«Qazirgi kezde Qazaqstannyń zańnamasynda avıabaǵyttardy sýbsıdııalaý tetigi bar, alaıda Úkimettiń aımaqtyq áýejaılardy tikeleı sýbsıdııalaýǵa ókilettigi joq. Bul problemany sheshý úshin «Áýe keńistigin paıdalaný jáne avıatsııa qyzmeti týraly» QR Zańyna ózgerister engizý qajet», - delingen kompanııanyń habarlamasynda.
«Airport Management Group» JShS 2013 jyly qarashada quryldy jáne memlekettik áýejaılar jelisin basqarý holdıngi bolyp tabylady. 2014 jylǵy qyrkúıekte Astana, Kókshetaý, Petropavl, Qostanaı, Shymkent, Qyzylorda qalalarynyń áýejaılary aktsııasynyń memlekettik paketteri AMG-ǵa senimdi basqarýǵa berildi. Basqarýshy kompanııanyń qorjynynda 11 áýejaıdy shoǵyrlandyrý kózdelgen.
