Qazaqstannyń birikken MMA federatsııasy basshylaryna izdeý saldy

Qazaqstannyń birikken MMA federatsııasy óz basshylary Alık Aıdarbaevqa izdeý jarııalady, dep habarlaıdy QazAqparat tilshisi.

«Qazaqstannyń birikken MMA federatsııasynyń jattyqtyrýshylary men sportshylary federatsııanyń is basyndaǵy prezıdenti Alık Aıdarbaevty izdeıdi. Alık Serikuly, sportshylarmen baılanysqa shyǵýyńyzdy suraımyz», - delingen federatsııanyń Instagram akkaýntynda jarııalanǵan málimette.

Jarııalanym astyndaǵy pikirlerdiń birinde: «Fedaratsııamyzdyń prezıdentin taba almaı júrmiz, baılanysqa shyqpaıdy. Ol federatsııany basqarǵan ýaqyttyń ishinde 100 mln teńgeden astam salyq bereshegi qalyptasyp otyr», - delingen.

Qyzylorda óńirlik MMA federatsııasy da jazba astynda pikir qaldyrǵan.

«Qurmetti Alık Aıdarbaev! MMA-nyń 16 oblystyq federatsııasy + jańadan qurylǵan oblystar jne QR respýblıkalyq federatsııasy. Máseleni sheshińiz. Myńdaǵan ul-qyz armadap, sizge laıyqty azamat retinde qarady. Ún qatyńyz. Azamat retinde isti sońyna deıin jetkizińiz. Men Qyzylordadamyn, kezdeskenbiz. Sizdiń bizde bıznesti laıyqty bastaǵanyńyz esimde. Ómirde bári bolady. Biraq, adam bolyp qalýǵa esh ýaqytta kesh emes», - delingen pikirde.

Týrızm jáne sport mınıstrligi osy jaıtqa baılanysty keıinirek pikir bildirýge ýáde berdi.

Alık Aıdarbaev Qazaqstannyń birikken MMA federatsııasynyń prezıdenti laýazymyna 2020 jylydń 20 aqpanynda saılandy. Ol 2013-2017 jyldary Mańǵystaý oblysynyń ákimi, al 2018-2022 jyldary «QazMunaıgaz» UK basqarmasynyń tóraǵasy bolǵan edi.