Qazaqstannyń birde-bir óńirinde kómir tapshylyǵy joq - Energetıka mınıstrligi
«Jıelep ketken qaýesetter men áleýmettik jelilerde jáne messendjerlerdegi jalǵan aqparattarǵa baılanysty QR Energetıka mınıstrligi kelesini málimdeıdi:
Elimizde halyqty kómirmen qamtamasyz etýge qatysty jaǵdaı turaqty. Qazaqstannyń birde-bir óńirinde qatty otynǵa tapshylyq joq, eshqandaı dúrlikpe baıqalmaıdy. Tuıyqtardaǵy úlken kezekter jáne júk mashınalarynyń talasýy jónindegi taratylyp jatqan vıdeolar feık jáne qazirgi ýaqyttaǵy jaǵdaıǵa sáıkes kelmeıdi. Sonymen qatar QR Energetıka mınıstrligi oblys ákimdikterimen jáne «Qazaqstan Temir Joly» UK AQ-men birlesip óńirlerge kómirdi jetkizýge táýlik saıynǵy monıtorıng júrgizýde, bul másele turaqty baqylaýda», - delingen taratylǵan habarlamada.
Mınıstrlikten málim etkendeı, 2017 jyly elimizde 106,7 mln tonna kómir óndirildi, bul 2016 jylǵy kórsetkishten 8,2 mln tonnaǵa artyq. Eksportqa 29,3 mln tonna kómir shyǵaryldy. Qalǵan kómir ishki qajettilikke jumsaldy.
Osy oraıda Qazaqstannyń energııa óndirýshi uıymdaryna 56,3 mln tonna, ıaǵnı 2016 jylmen salystyrǵanda 7,1 mln tonnaǵa artyq kómir berildi.
«Jedel derekterge sáıkes 30 qańtarǵa deıingi merzimde óndirilgen kómir kólemi 8,6 mln tonnany qurady. Tutynýshylarǵa kommýnaldyq-turmystyq qajettilikke 763,8 myń tonna kómir jiberildi, ıaǵnı aldyńǵy jyldyń sáıkes kezeńimen salystyrǵanda 72%», - dep atap ótti mınıstrlikten.
«Qazaqstan Temir Joly» AQ málimetine sáıkes, 2018 jyldyń 30 qańtaryna deıingi merzimde temir jol kóligimen kommýnaldyq-turmystyq qajettilikke jáne halyqqa 457,2 myń tonna kómir jóneltildi. Avtokólikpen 300 myń tonna kómir túsirildi.
2018 jylǵy 30 qańtardaǵy jaǵdaı boıynsha, QR Energetıka mınıstrliginiń jedel málimetterine sáıkes kómirdiń qory men jetkizilýi oblystar boıynsha kelesideı: Aqmola oblysy - 85,9 myń tonna; Astana qalasy - 17,2 myń tonna; Aqtóbe oblysy - 2,1 myń tonna; Almaty oblysy - 77,4 myń tonna; Almaty qalasy - 6,8 myń tonna; Shyǵys Qazaqstan oblysy - 114,7 myń tonna; Jambyl oblysy - 8,9 myń tonna; Qaraǵandy oblysy - 53,0 myń tonna; Qostanaı oblysy - 24,3 myń tonna; Pavlodar oblysy - 9,8 myń tonna.
