Qazaqstannyń bilimine degen halyqaralyq suranysty qalyptastyrýǵa bolady - Halyqaralyq zertteý agenttiginiń dırektory
STANA. Naýryzdyń 31-i. QazAqparat /Arman Asqarov/ - Bolashaqta Qazaqstannyń bilimine degen halyqaralyq suranystyń bolýy zańdy.
Búgin Lev Gýmılev atyndaǵy Eýrazııa ulttyq ýnıversıtetinde semınar ótkizgen Halyqaralyq zertteý agenttiginiń aımaqtyq dırektory Zoıa Zaıtseva osylaı aıtty, dep habarlaıdy QazAqparat.
Onyń aıtýynsha, mamandardyń boljamy boıynsha shetelde bilim alatyn jastardyń úlesi jyl saıyn ósetin bolady. «Sondyqtan osy halyqaralyq bilim berý úrdisine qatysyp, óziniń atyn shyǵarýǵa umtylatyn ýnıversıtetter úshin bul úlken múmkindik. Osy oraıda Qazaqstannyń bilimine degen suranystyń bolýy zańdy. Máselen, shetelden keletin jastar munaı-gaz jáne aımaqtyq zertteýler boıynsha bilim alýǵa nıetti. Ol úshin, eń birinshi, sheteldikter Qazaqstanda qansha ýnıversıtet bar ekenin bilýi tıis. Ekinshiden, ol joǵary oqý oryndaryndaǵy bilim deńgeıi jáne onda oqyǵannan keıin qandaı qyzmettik jetistikterge jete alatyndaǵy jaıynda jan-jaqty habardar bolýy qajet», - deıdi Z.Zaıtseva.
Mamannyń pikirinshe, búgingi tańda kez kelgen ýnıversıtetti halyqaralyq deńgeıge shyǵarý úshin, eń aldymen, ol týraly barlyq aqparatty aǵylshyn tilinde taratý qajet. «Ýnıversıtettiń veb-saıtyndaǵy barlyq málimetter únemi aǵylshyn tiline aýdarylyp otyrýy tıis. Máselen, bizdiń agenttikte 100-den astam maman qyzmet etýde. Olardyń 2-ýi ǵana orys tilinde aqparat jınaıdy. Qalǵan sarapshylardyń bári aǵylshyn tilindegi málimettermen jumys isteýde. Sondyqtan ýnıversıtetterdiń reıtıngsin ázirleý barysynda aǵylshyn tilinde usynylǵan aqparattarǵa basa nazar aýdarylady. Osynyń negizinde halyqaralyq reıtıng daıarlanyp, joǵary oqý oryndary búkil álemge tanylady», - deıdi Z.Zaıtseva.
Aıta keteıik, atalǵan Halyqaralyq zertteý agenttiginiń 2009 jylǵy reıtıngisine qatysqan Ál-Farabı atyndaǵy Qazaq ulttyq ýnıversıteti, Lev Gýmılev atyndaǵy Eýrazııa ulttyq ýnıversıteti, Qanysh Sátpaev atyndaǵy Qazaq ulttyq tehnıkalyq ýnıversıteti jáne Evneı Býketov atyndaǵy Qaraǵandy memlekettik ýnıversıteti álemdegi úzdik 700 ýnıversıtetterdiń qatarynan kórine bildi. Al Garvard ýnıversıteti 2004 jyldan beri birinshi orynnan túspeı keledi.
