Qazaqstannyń bı sporty tarıhyndaǵy zor jetistikke qaraǵandylyq jup qalaı jetti
Sporttyq bı boıynsha álem chempıonaty 19 qarashada Salaspılse qalasynda (Latvııa) ótti. Maksım Jılenkov pen Arına Molochnıkova eýropa jáne ıspan bılerin usyndy – ár túr boıynsha bes bıden. Nátıjesinde barlyq 10 bıde úzdik boldy.
«Maksım men Arına uzaq jáne eren eńbekteri arqyly jeńiske jetti. Bul – búkil qazaqstandyq bı sporty úshin úlken jeńis. Óıtkeni, bul – Qazaqstan tarıhyndaǵy sporttyq bıden álem chempıonatyndaǵy alǵashqy jeńis. Bizdiń klýbta olar 6 jastan bastap jattyǵady. 13 jyl ishinde bul jup elimizdiń jáne qazaqstandyq akkredıttelgen sporttyq bı federatsııasynyń 18 dúrkin chempıony, QR kýboginiń birneshe dúrkin ıegeri, halyqaralyq jarystardyń fınalısi, júldegeri jáne jeńimpazy atandy. Olar sondaı-aq, Azııanyń tórt dúrkin chempıony atandy. 2019 jyly Rýmynııada ótken álem chempıonatynda bıshiler qola medal jeńip aldy», - deıdi «Sofııa» bı sport klýbynyń jetekshisi Ksenııa Akateva.
Ótken jyly álem chempıonatynda óner kórsetý kezinde sportshylarǵa fınalǵa deıin bir qadam jetpeı qalǵan.
«Maksım men Arına – naǵyz jaýyngerler, olar belsendi jattyǵady, únemi sheberlik deńgeılerin kóteredi, Eýropadaǵy bedeldi jattyqtyrýshylardan jeke sabaq alady. Ata-analary da olarǵa óz maqsattaryn júzege asyrýǵa kómektesedi. Balalar jylyna birneshe mańyzdy starttarǵa qatysady. Qazir de olar Latvııadan oralǵannan keıin Almatyǵa ketedi», - dep atap ótti Ksenııa Akateva.
Aldaǵy ýaqytta Maksım men Arına Italııa men Horvatııadaǵy álem chempıonattarynda dara túrde óner kórsetedi.
Eske salsaq, Qazaqstan sporttyq bıden álem chempıonatynda alǵash ret jeńiske jetkeni habarlanǵan bolatyn. Qazaqstan ulttyq quramasynyń músheleri 32 eldiń bıshileri arasynda úzdik dep tanyldy.
