Qazaqstannyń bes óńirinde 80 úıdi sý basyp, apattyq-qutqarý jumystary júrgizilýde

QR ІІM Tótenshe jaǵdaılar komıteti aqparattandyrý jáne memelkettik til basqarmasynyń habarlaýynsha, Aqmola oblysynyń Atbasar qalasynda turǵyn úılerdi sýdan qorǵaý úshin ınertti materıaldar toltyrylǵan qaptarmen bógender salynýda. Barlyǵy 19 100 qap qalanǵan. Budan bólek, jyra men saı-salalardy keńeıtý, tereńdetý jumystary atqarylyp jatyr.

Al Tselınograd aýdany Talapker aýylynda Esil ózeniniń arnalaryn keńeıtý sharalary qolǵa alynǵan. Aǵyn sýlardy sarqý jumystary atqarylyp, jalpy 2736 myń tekshe sý sorylǵan. Qoıandy aýylynda jınalǵan sýlardy aǵyzatyn arnalar ashylyp, 400 metr arna qazylǵan. 2160 tekshe metr sý soryldy. Birlik aýylynda qoldan dambalar turǵyzylýda. Aqmol aýylynda ınertti materıaldar toltyrylǵan qaptarmen bógetter jasalyp jatyr.

Astrahan aýdanynyń Besbıdaıyq aýylynda da jaǵdaı osyǵan uqsas.
Al Kókshetaý qalasynda Kókshetaý balalaq psıhonevrologııalyq medıtsına-áleýmettik mekemesinde jertóleden jınalǵan 180 tekshe metr aǵyn sýlar sorylǵan. Jalpy Aqmola oblysynda TJ komıteti men jergilikti atqarýshy organdardyń, polıtsııa qyzmetiniń 743 adamy men 110 birlik tehnıkasy osy jumystarǵa tartylyp otyr.

Soltústik Qazaqstan oblysynyń Teńdik aýylynda - Shańalyteńiz kólinde muz jarý jumystary 500 sharshy metrge jasaldy.
Taıynsha aýdanynyń Kellerovka aýylynda jınalǵan aǵyn sýlar 37 úıdiń aýlasyn basyp qalǵan. 26 adam basqa oryndarǵa evakýatsııalanyp, 50 mal basy aıdap áketildi. Halyqqa sý basý qaýpi týraly habarlama jasaldy. Aǵyn sýlardy qashyrý jumystary júrgizilgen.
Al Mnogotsvetnoe aýylyndaǵy 5 úı men 25 aýlany sý basqan. Sý deńgeıi 20-30 sm qurady. Qutqarýshylar men jergilikti atqarýshy organ qyzmetkerleriniń kómegimen sýlardy aǵyzý jumystary júrgizilýde.

Taıynsha aýdany Krasnaıa aýylynda áli de 25 úı men 37 aýla sýdan tazartylmaǵan, 42 turǵyn ýaqytsha týystarynyń úı-jaılaryna jaıǵastyryldy.

Dobrojanovka aýylynda 7 úı men 26 aýlany sý basty. 48 adam kóshirilgen. Apat ornynda ınjenerlik tehnıkalar jumyldyrylyp otyr. Jaǵdaıdy udaıy baqylaý úshin túngi ýaqytqa kezekshilik uıymdastyryldy.

Obýhovka aýylynda 5 úıdi aǵyn sýlar basyp, 22 adam evakýatsııalanǵan. Jınalǵan sýlardy shyǵarý úshin tıisti sharalar atqarylýda. Bul aýylda jaǵdaı turaqty, sý deńgeıi tómendep keledi.
Esil aýdanynyń jańa ózen aýylynda 8 úıdiń aýlasyn da sý basqan. Jergilikti deńgeıdegi joldardy ashý úshin ınjenerlik jumystar atqarylyp jatyr.
Aqqaıyń aýdany Bezlesnoe aýylynda jınalǵan sýlardy aǵyzý úshin jol jabyndaryn buzý jumystary júrgizilgen.
Al Petropavl qalasynda 17 turǵyn úıdiń aýmaǵynan 1300 tekshe metr sý sorylǵan.

Aqtóbede Jańa Áljan kanalynyń jaǵasyn nyǵaıtý jumystary júrgizilip, 3500 tekshe metr sý sorylǵan.
Qostanaı oblysynyń eldi mekenderinde 5400 tekshe metr sý soryldy. Sý basý qaýpine qarsy sharalar Qostanaı qalasynda, Qostanaı aýdany Tobyl aýdanynda, Arqalyq qalasyndaǵy Severnyı jáne Munaıbaza aýyldarynda, Uzynkól, Qashar, Fedorovka, Taran, Sarykól aýyldaryndja júrgizildi.

«Búgingi kúni 80 úı sý astynda qaldy, onyń ishinde Qaraǵanda qalasy, Krasnaıa polıana aýyly, Dobrojanovka aýyly, Obýhovka, Mnogotsvetnoe aýyly jáne Soltústik Qazaqstan oblysynyń Taıynsha aýdanyndaǵy eldi mekender, Qostanaı qalasyndaǵy turǵyn úıler bar. Sý basqan úılerdegi sý deńgeıi 10 -20 santımetrge jetedi. Aqmola, Soltústik Qazaqstan oblystarynyń TJ komıteti qutqarý bólimsheleri, jergilikti atqarýshy bılik jáne basqa da jumyldyrylǵan uıym kúshterimen ýaqytsha 23429 metrdi quraıtyn bógetter turǵyzylǵan. Al Aqmola, Aqtóbe, Qaraǵandy, Soltústik Qazaqstan oblystarynda ınertti materıaldar toltyrylǵan 78338 qap qalanǵan; Aqmola, Aqtóbe, Qaraǵandy, Qostanaı, Soltústik Qazaqstan oblystarynda 328712,8 tekshe metr sý soryldy. Jalpy sý basý qaýpine qarsy 2332 adam, 570 birlik tehnıka jumyldyrylyp, 116 sýsorǵy qurylǵylary, 19 júzý quraldary paıdalanyldy», - delingen baspasóz baıanynda.