Qazaqstannyń bes oblysynda shańdy daýyl turady
ASTANA. QazAqparat - «Qazgıdromet» elimizdiń bes oblysynda daýyl turatyny jaıynda eskertý jarııalady, dep habarlaıdy QazAqparat.
Atap aıtqanda, 10-12 mamyrda Qyzylorda oblysynyń keıbir aımaǵynda shań kóterilip, qatty jel turady degen boljam bar. Shyǵystan soqqan jeldiń jyldamdyǵy 15-20 m/s deıin kúsheıedi.
11 mamyrda Ońtústik Qazaqstan oblysynyń birqatar aýdandarynda kún kúrkirep, jel kúsheıedi, shańdy daýyl soǵady.
10 mamyrda Qostanaı oblysynyń keıbir aımaqtarynda kún kúrkirep, jel sekýndyna 15-20 m/s deıin artady. Munymen qosa, 11 mamyrda osy oblysta tuman túsip, jel soǵatyny boljanady.
Budan buryn habarlanǵandaı, Qazaqstannyń batysynda aýa raıynyń buzylýyna baılanysty eskertý jasalǵan bolatyn.
10-11 mamyrda Atyraý oblysynyń keıbir aýdandarynda kún kúrkirep, shań kóteriledi, qatty jel turýy yqtımal. Shyǵystan soǵatyn jeldiń jyldamdyǵy sekýndyna 15-20 metrge jetedi.
10-11 mamyrda Batys Qazaqstan oblysy aýmaǵynda da soltústik-shyǵystan jel soǵyp, jyldamdyǵy 15-20 m/s artady. Keıbir aýmaqtarda shańdy daýyl soǵyp, burshaq jaýýy múmkin. Oralda atalǵan kúnderi jeldiń jyldamdyǵy 15-20 m/s deıin jetip, kún kúrkireýi yqtımal.
