Qazaqstannyń bes oblysynda kún kúrt sýytady, keıbir jerlerde aýanyń temperatýrasy 25 gradýsqa deıin tómendeıdi
ASTANA. 6 qarasha. QazAqparat -Qazaqstannyń bes oblysynda kún kúrt sýytady, keıbir jerlerde aýanyń temperatýrasy 25 gradýs aıazdy kórsetedi, dep habarlaıdy TJM-niń baspasóz qyzmetinen Qazgıdrometke silteme jasaı otyryp.
7-8 qarasha kúnderi Aqmola, Soltústik Qazaqstan, Pavlodar, Qaraǵandy, Shyǵys Qazaqstan oblystarynda aýa temperatýrasy kúrt tómendeıdi: túnde 13-18 gradýs aıazdy, birqatar aımaqtarda 25 gradýsqa deıin sýyqty kórsetedi, kúndiz synap baǵanasy 5-10 gradýsqa deıin, birqatar aımaqtarda 15 gradýsqa deıin tómendeıdi.
7 qarashada Shyǵys Qazaqstan oblysynda jaýyn-shashyn kútiledi, keıbir jerlerde qatty jaýyn-shashyn jaýyp, kók taıǵaq bolady, jeldiń jyldamdyǵy 15-20 m/s deıin kúsheıedi, túnde Aqmola, Pavlodar oblystarynyń birqatar jerlerinde burqasyndatyp, jeldiń kúsheıýi yqtımal.
Almaty oblysynda 7 qarasha kúni jaýyn-shashyn, kúndiz taýly aýdandarda qatty jaýyn-shashyn jaýyp, jeldiń jyldamdyǵy 15-20 m/s deıin kúsheıýi kútiledi.
