Qazaqstannyń baıtaq jerlerin sheteldik rejısserlerge tanystyratyn kınokomıssııa qurylady
ASTANA. QazAqparat - Qazaqstannyń sulý tabıǵatyn sheteldik rejısserlerge tanytý maqsatynda arnaıy kınokomıssııa qurylady, dep habarlaıdy QazAqparat.
Kann festıvaliniń qazaqstandyq pavılonynda Eýropa men Azııa kınokomıssııalarymen osyndaı kelissózderge qol jetkizildi.
Ulttyq kınematografııa óneri jáne ǵylymdary akademııasynyń prezıdenti Rashıd Nýgmanovtyń sózine qaraǵanda, jaqyn arada Qazaqstan halyqaralyq kınokomıssııalar odaǵyna engen jaǵdaıda Altaı men Atyraýdyń arasyndaǵy ulan-ǵaıyr alqapta sheteldik túsirilim toptarynyń sany artýy kerek.
«Kann festıvalinde birqatar mańyzdy kelisimder jasaldy. Onyń biri - kınokomıssııa qurý. Qazaqstan úshin bul jańashyldyq, biraq álemdik qaýymdastyq úshin ol burynnan bar. Bul uıym jergilikti ákimshilik organdar men Qazaqstanda túsirilim júrgizý qyzmetin kórsetetin kınematografııalyq uıymdarmen kelisim jasaıdy. Árdaıym bizdiń baı tabıǵat, peızajdar men keremet landshafttar týraly aıtamyz. Qazaqstanǵa ár jerden túsirilim toptaryn tartýymyz kerek, biraq ol qolymyzdan ázirshe kelmeı otyr, sebebi osyndaı kınokomıssııalardy quryp, halyqaralyq kınokomıssııalar odaǵyna kirýimiz shart. Olar ózdiginen kelmeıdi, olarǵa túsirilim júrgizýge saı keletin elder usynylady. Sondyqtan biz Eýropa men Azııa kınokomıssııalarymen áriptestik ornatý týraly kelissózder júrgizdik. Qazir biz Mádenıet jáne sport mınıstrligimen, ákimdiktermen belsendi jumys atqarýdamyz. Jaqynda Almaty ákimdigimen memorandýmǵa qol qoıý josparymyzda bar. Osy bastamamyz keń etek alsa deımiz, sebebi Qazaqstannyń shyǵysynan batysyna deıin, ońtústiginen soltústigine deıin keremet jerlerimiz bar. Túsirilim toptaryn óz jerimizde kóptep kóremiz dep úmittenemin», - dedi ol búgin Ortalyq kommýnıkatsııalar qyzmetinde ótken baspasóz máslıhatynda.
Aıta keteıik, 2017 jyldyń 17-28 mamyr kúnderi ótken 70-shi mereıtoılyq Kann festıvaliniń aıasynda otandyq kınematografııa tarıhynda alǵash ret Qazaqstannyń ulttyq kınopavılony ashylǵan bolatyn.
