Qazaqstannyń batysyndaǵy joldar qurylysy qalaı júrip jatyr

ASTANA. QazAqparat - QR Indýstrııa jáne ınfraqurylymdyq damý mınıstri Qaıyrbek Óskenbaevtyń tapsyrmasy boıynsha Avtomobıl joldary komıtetiniń tóraǵasy Tólegen Abdýllın «Aqtóbe – Qandyaǵash – Maqat», «Atyraý –RF shekarasyna deıin (Astrahanǵa)» avtojol jobalaryndaǵy jumys barysyn tekserdi. Bul týraly QazAqparat osy mınıstrliktiń baspasóz qyzmetine silteme jasap habarlaıdy.

Málimetke qaraǵanda, búginde «Aqtóbe – Qandyǵash» ýchaskesinde 5 785 myń m3 jer tósemi tóselgen. Joldyń 28,5 shaqyrymynda negizdiń qosymsha qabaty, 28 shaqyrymynda negizdiń tómengi jáne 26,5 shaqyrymynda joǵarǵy qabaty, al 22,5 shaqyrymynda jabynnyń tómengi qabaty ornatylǵan. Joba boıynsha barlyǵy 1 160 myń tonna asfaltbeton tóselý qajet. Qazirgi kúnge deıin jol jabynynyń 288 myń tonnasy tóselgen. Qozǵalys bir jolaqta 41 shaqyrym boıynda ashylǵan. Bıylǵy jyldyń sońyna deıin taǵy 16 shaqyrymdy qozǵalyspen qamtamasyz etý kózdelgen.

Al «Qandyaǵash – Maqat» ýchaskesinde kólik qozǵalysy 299 shaqyrym boıymen tolyq qamtamasyz etilgen. Qazirgi ýaqytta joldy abattandyrý jumystary júrgizilýde. «Atyraý – RF shekarasyna deıin (Astrahanǵa)» ýchaskesi boıynsha qozǵalys 277 shaqyrymnyń 130 shaqyrymynda ashylmaq. Jobany tolyq aıaqtaý 2023 jylǵa qaraı josparlanǵan.

Sonymen qatar Tólegen Abdýllın merdiger uıymdarmen jáne «QazAvtoJol» UK» AQ, «Jol aktıvteriniń ulttyq sapa ortalyǵy» RMK oblystyq fılıaldarynyń ókilderimen jáne qurylysty qadaǵalaý jónindegi konsýltanttarmen keńes ótkizdi.

Jıyn sońynda komıtet tóraǵasy merdigerlik uıymdarǵa ýchaskelerdiń qysqy kezeńde paıdalanýǵa daıyndyǵyn qamtamasyz etýdi júktedi. Sondaı-aq jaýapty tulǵalarǵa 2023 jylǵy qurylys maýsymyna jol-qurylys materıaldaryn daıyndaýdy, onyń ishinde jabynnyń joǵarǵy qabaty úshin polımer-modıfıkatsııalanǵan bıtýmdy qoldanýdy eskere otyryp, qamtamasyz etýdi mindettedi.

Budan bólek, Tólegen Abdýllın «Aqtóbe – Qandyaǵash» ýchaskesi boıynsha avtokólik quraldarynyń oń jaǵymen qaýipsiz jáne úzdiksiz qozǵalyspen qamtamasyz etýdi tapsyrdy. Al «Qandyaǵash – Maqat» ýchaskesi boıynsha aǵymdaǵy jyldyń 25 qazanyna deıingi merzimde qozǵalys qaýipsizdigine áser etetin aqaýlardy joıýdy júktedi.

«Bizdiń aldymyzda Shubarqudyq jáne Noǵaıty kentterindegi eksplýatatsııalyq pýnktterdiń qurylysyn aıaqtaý mindeti tur. Joldardy abattandyrý jáne jol tańbalaryn belgileý, maıysqan elementterdi túzetip, osyǵan deıin anyqtalǵan barlyq aqaýlardy joıyp, qystyń kúni qardan qorǵaıtyn qorshaýlardy ornatý qajet. Jasandy qurylys mańyndaǵy ózen arnalarynda tazartý jumystaryn júrgizý, jol jıekterindegi shópti shaýyp, karerlerdi qalpyna keltirý de erekshe mańyzǵa ıe», – dep atap ótti Tólegen Abdýllın.

Óz kezeginde Jol aktıvteriniń ulttyq sapa ortalyǵynyń Aqtóbe jáne Atyraý oblystyq fılıaldarynyń qyzmetkerlerine 15 qazanǵa deıingi merzimde ýchaskeler boıynsha anyqtalǵan aqaýlardy joıý úshin usynystar men ádis-tásilderdi usyný tapsyryldy.

Al qurylysty qadaǵalaý jónindegi konsýltanttarǵa qurylys-montajdaý jumystarynyń der kezinde jáne sapaly oryndalýyn, merdigerlik uıymdardyń kelisimsharttyq mindettemelerdi iske asyrýyn baqylaýdy kúsheıtý mindeti qoıyldy.

Foto : gov.kz