Qazaqstannyń batysynda - jańbyr, naızaǵaı, ekpindi jel kútilip otyr - 12 sáýirge arnalǵan aýa raıy boljamy
ASTANA. 11 sáýir. QazAqparat - Qazaqstannyń kóptegen aýmaǵyna antıtsıklon yqpal etýde, respýblıkanyń tek batysynda ǵana atmosferalyq frontaldyq bólikterdiń ótýimen birge 12 sáýir kúni naızaǵaıy bar ótkinshi jańbyrlar men ekpindi jel kútilip otyr,
dep habarlaıdy Qazgıdrometke silteme jasaǵan TJM-niń baspasóz qyzmetinen.
Almaty oblysyndaǵy Alakól kólderi aýdanynda 17-22 metrge deıin jel kúsheıedi.
Ońtústik Qazaqstan oblysynda keıbir jerlerde jeldiń 15-20 m/s deıin kúsheıýi, shańdy daýyl bolýy yqtımal.
Kúndiz Jambyl, Qostanaı oblystarynda - keıbir jerlerde jel sekýndyna 15-20 metrge deıin kúsheıedi.
Mańǵystaý oblysynda keıbir jerlerde tuman túsip, naızaǵaı jarqyldaıdy, jeldiń 15-20 m/s deıin kúsheıýi kútilýde.
Atyraý, Batys Qazaqstan oblystarynyń keıbir jerlerinde tuman túsedi.
Jaqyn táýlikterde SQO aýmaǵyndaǵy Esil ózeninde, Ertiste muz erip, seń júrý jalǵasady. Jaıyq ózeninde (BQO boıynsha), Batys Qazaqstan, Aqtóbe, Qostanaı, Soltústik Qazaqstan, Aqmola, Qaraǵandy oblystaryndaǵy keıbir ózenderde tasqyndardyń kúsheıýi, sý deńgeıiniń kóterilýi kútiledi. Respýblıkanyń ońtústik, ońtústik-shyǵys jáne shyǵysyndaǵy ózenderinde sýlylyqtyń aýytqýlary baıqalady.
