Qazaqstannyń batysy men ortalyǵynda jel jáne kún elektr stantsııasy salynady

NUR-SULTAN. QazAqparat – Elimizdiń batys jáne ortalyq óńirlerinde nemis tehnologııasy negizinde kún jáne jel elektr stantsııasy jobasy qolǵa alynbaq. Bul týraly QR Syrtqy ister mınıstriniń orynbasary Roman Vasılenko málim etti, dep habarlaıdy QazAqparat tilshisi.

«Nemis kapıtalynyń qatysýymen 600-den astam kásiporyn tabysty jumys istep jatyr. Bizdiń elimizge nemis kompanııalarynyń qyzyǵýshylyǵy arta túsýde. Sońǵy 15 jylda Germanııadan Qazaqstanǵa kelip túsken tikeleı ınvestıtsııalar 5,3 mlrd dollar qurady. Onyń basym bóligi (shamamen 80%) shıkizattyq emes sektorǵa, aýyl sharýashylyǵy, qurylys, densaýlyq saqtaýǵa, kólik logıstıkasyna baǵyttaldy», - dedi Roman Vasılenko mınıstrlikte ótken baspasóz máslıhatynda.

Onyń aıtýynsha, búginde Saran qalasynda nemistiń «Goldbeck Solar» atty fırmanyń qatysýymen Ortalyq Azııadaǵy iri, qýaty 100 megavattyq kún elektr jobasy iske qosyldy.

«Jaqyn arada «SVEVIND» Drezden kompanııasy batys jáne ortalyq Qazaqstannyń dalasynda jalpy qýaty 45 gıgavatt jel jáne kún elektr stantsııalaryn salý boıynsha iri jobaǵa kirisedi. Qazaqstan - nemis kásipkerleri men ınvestorlary úshin jańa múmkindikter mekeni, áleýeti joǵary. Ekijaqty ınvestıtsııalyq ahýaldy jetildire túsý arqyly ortaq jetistikte qol jetkizetinimizge senimdimin», - dedi ol.