Qazaqstannyń batys óńiri lańkestikke tartylǵandar sany boıynsha kósh basynda
2013 jyly Qazaqstanda ekstremızm men lańkestik faktileri boıynsha 83 tulǵaǵa qatysty 38 qylmystyq is qaralǵan. Eń kóp ister Atyraý, Almaty, Aqtóbe, Ońtústik Qazaqstan, Pavlodar oblystarynda jáne Almaty qalasynda tirkelgen.
Mysaly, qylmystyq ister boıynsha Atyraý aýdanaralyq sotynda Qurmanǵazy aýdanynyń birneshe turǵyndaryna qatysty qylmystyq is qaraldy. Olar jyldar boıy radıkaldy «salafızm» baǵytyn belsendi úgittep kelgen jáne áskerı «jıhad» jasaý maqsatynda Aýǵanstan, Pákistan, Soltústik Kavkaz ben Sırııaǵa jol tartý qajettigin nasıhattaǵan.
Lańkestik topqa birikken olar, Ulttyq qaýipsizdik komıteti departamentiniń aýdandyq bólimshesinde, oblys prokýratýrasynda jáne Atyraý qalalyq Іshki ister basqarmasynda jankeshtiler arqyly lańkestik aktiler jasaý maqsatynda qoldan jarylǵysh zattar jasaǵan.
Degenmen bul áreketterin jasaýǵa úlgergen joq.
2013 jyldyń qazan aıynda olar 6-dan 14 jylǵa deıin bas bostandyǵynan aıyrý jazasyna kesildi.
«Qazirgi ýaqytta ulttyq zańnamany jańǵyrtý aıasynda Qylmystyq kodekstiń jańa jobasynda lańkestik topty qurý jáne onyń jumysyna septesý qylmystaryna jaza kúsheıtildi. Mysaly, Qazaqstannan tys memleketterde áskerı qurylymdarǵa kirý, lańkestik jáne ekstremıstik jattyǵýǵa qatysý, shet eldegi qarýlanǵan qaqtyǵystarǵa qatysý syndy qylmystarǵa jaza qoldanylatyn bolady», - delingen habarlamada.
