Qazaqstannyń batys aımaqtarynda jáne Qyzylorda oblysynda koronavırýs tirkelgen joq
NUR-SULTAN. QazAqparat - Úkimet delegatsııasynyń Mańǵystaý, Atyraý, Aqtóbe, Batys Qazaqstan jáne Qyzylorda oblystaryna sapary barysynda Qazaqstan Respýblıkasy Premer-Mınıstriniń orynbasary ár oblystaǵy týberkýlezge qarsy dıspanserlerde jáne juqpaly aýrýlar aýrýhanalarynda boldy.
Bul týraly QR Úkimetiniń resmı saıty habarlady.
«Bizdiń elimizde koronavırýstyń taralýyn boldyrmaý úshin shuǵyl sharalar qabyldanǵanyn bilesizder. Ókinishke qaraı, bizdiń elde koronavırýs qaýpi týraly aqparat rastaldy. Búgin bizdiń aldymyzda koronavırýstyq pnevmonııaǵa qarsy turý mańyzdy mindeti tur», - dep atap ótti Eraly Toǵjanov.
Aýrýdyń aldyn alý úshin elimizdiń aımaqtarynda oqshaýlanýǵa arnalǵan aýrýhanalar daıyndalǵan. Buǵan deıin habarlanǵandaı, oblystardaǵy barlyq medıtsınalyq mekemeler belsendi jumys istep, shekaralyq karantın beketteri quryldy, medıtsına qyzmetkerleri oqytylyp, jeke qorǵanys quraldarymen qamtamasyz etildi.
Mańǵystaý oblysynda 60 tósek-oryndyq Mańǵystaý oblystyq aýrýhanasynyń ınfektsııalyq bólimi, 280 tósek-oryndyq oblystyq týberkýlezge qarsy dıspanseri (farmatsevtıkalyq aýrýhana) jumys isteıdi. 70 tósek-oryndyq Jańaózen qalasyndaǵy kópsalaly aýrýhananyń ınfektsııalyq bólimi jáne oblysta 7 sanıtarlyq karantın pýnkti bar.
Atyraý oblysynda barlyq medıtsınalyq nysandar belsendi jumys isteýge kóshti, shekaralyq karantın beketteri quryldy, medıtsına qyzmetkerleri oqytylyp, jeke qorǵanys quraldarymen qamtamasyz etildi. Sonymen qatar, aımaqta jeldetýdiń 12 mehanıkalyq qurylǵysy jáne 100 oryndyq oqshaýlanǵan ǵımarat bar.
Aqtóbe oblysynda koronavırýstyq ınfektsııanyń taralýyn boldyrmaý jónindegi is-sharalar aıasynda qajetti sharalar qabyldanýda. 130 kereýetke arnalǵan tósek qory, modernızatsııalanǵan materıaldyq-tehnıkalyq bazasy bar ınfektsııalyq aýrýhanasy, 200 oryndyq farmatsevtıkalyq aýrýhana, 500 oryndyq observatsııa bar. Mekemeler qajetti dári-dármektermen qamtamasyz etilgen, medıtsına qyzmetkerleri oqytyldy.
Batys Qazaqstan oblysynda barlyq medıtsınalyq uıymdar jeke qorǵanys quraldarymen, dári-dármektermen jáne qajetti dezınfektsııalyq quraldarmen qamtamasyz etilgen. Qazaqstan Respýblıkasy Úkimetiniń rezervinen dári-dármekter men medıtsınalyq maqsattaǵy buıymdardy satyp alýǵa 38,9 mln teńge bólindi. Oblysta ınfektsııalyq, aldyn-alý jáne karantındik oryndar anyqtaldy. Oblystyń medıtsınalyq mekemelerinde 194 tósek ornalastyrylǵan.
Koronavırýstyq ınfektsııaǵa kúdikti naýqastar joq. Basqa elderden kelgenderge táýlik boıy monıtorıng júrgizilýde.
Qyzylorda oblysynda koronavırýstyq ınfektsııa tirkelmegen. Oblysta 100 oryndyq provızorlyq statsıonar jáne 400 oryndyq karantın ortalyǵy qajetti qural-jabdyqtarmen, medıtsınalyq qorǵanys quraldarymen jáne dári-dármektermen jabdyqtalǵan. Sonymen qatar QR Úkimeti qabyldaǵan sharalarǵa sáıkes koronavırýstyq ınfektsııanyń taralýyn boldyrmaý úshin qajetti sharalar qabyldanýda.
Qazaqstan Respýblıkasy Premer-Mınıstriniń orynbasary koronovırýs ınfektsııasy bar naýqastarǵa medıtsınalyq kómek kórsetýge arnalǵan medıtsınalyq uıymdardyń daıyndyǵy men jabdyqtalý deńgeıimen tanysý nátıjeleri boıynsha qajetti dári-dármektermen jáne medıtsınalyq uıymdardy qajetti medıtsınalyq jabdyqtarmen, jeke qorǵanys quraldarymen qamtamasyz etýdiń mańyzdylyǵyn atap ótti.
Sondaı-aq ınfektsııalyq aýrýhanalardyń patsıentterdi qabyldaýǵa daıyndyǵy men qajet bolǵan jaǵdaıda qosymsha oryndardy jedel berý qajettiligi jáne epıdemıologııalyq jaǵdaıǵa turaqty monıtorıng júrgizýge erekshe nazar aýdaryldy.
Eske salaıyq, QR Prezıdenti Qasym-Jomart Toqaevtyń tapsyrmasymen Premer-Mınıstrdiń basshylyǵymen eldegi ekonomıkalyq jaǵdaıdyń daǵdarysqa qarsy josparyn ázirleý úshin jedel áreket etý shtaby quryldy.
Memleket basshysy Úkimetke halyq aldyndaǵy barlyq mindettemelerdi tolyǵymen oryndaýdy, jumyspen qamtýdy jáne áleýmettik turaqtylyqty qamtamasyz etý jónindegi sharalardy kúsheıtýdi tapsyrdy.
13-15 naýryzda Qazaqstan Respýblıkasy Premer-Mınıstriniń orynbasary Eraly Toǵjanov bastaǵan úkimet delegatsııasy Qazaqstannyń bes oblysynda boldy.
