Qazaqstannyń batys aımaǵyndaǵy avtojoldardyń sapasy syn kótermeıdi - vıtse-mınıstr
Bul týraly Oral qalasynda uıymdastyrylǵan óńirlik keńeste QR Indýstrııa jáne ınfraqurylymdyq damý vıtse-mınıstri Berik Kamalıev aıtty. Respýblıkalyq avtojoldardyń sapasy Qazaqstan boıynsha ol 90 % bolsa, aımaqta - 84 %. Jergilikti joldardyń jaǵdaıy da máz emes. Tıisti kórsetkish nebári 58 % shamasynda.
«Búgingi tańda batys óńirde birqatar joldar salynyp, jańǵyrtylýda. Sonyń biri - uzyndyǵy 715 shaqyrymdyq «Aqtóbe-Atyraý-Astrahan» kólik dálizi. Jaqynda «Podstepnoe- Fedorovka-RF shekarasy» avtojolyn jańartý bastalady. Sondaı-aq, Oral qalasyn aınalyp ótetin «Oral-Atyraý» jáne «Aqtóbe-Ulǵaısyn» joldary boıynsha jobalaý-izdestirý jumystary júrgizilýde.
2019 jyly kúrdeli jóndeý bastalǵan «Kaztalovka-Jánibek-RF shekarasy» jáne «Ónege-Bısen-Saıhın» avtojoldarynyń 130 shaqyrymynda bıyl qozǵalys ashylyp, 2023 jyly tolyqtaı aıaqtaý josparlanyp otyr», - deıdi Kamalıev.
Respýblıka boıynsha jergilikti joldardyń jalpy uzyndyǵy 70 myń shaqyrym bolsa, sonyń 11 myń shaqyrymy - batys óńirde. Búgingi tańda olardyń kórsetkishi eń tómen bolyp otyr, onyń ishinde Batys Qazaqstan oblysynda nebári 39 %-dy quraıdy. Vıtse-mınıstrdiń aıtýynsha, 2025 jylǵa deıingi kezeńge arnalǵan Keshendi damý josparyna sáıkes óńirdegi joldardyń normatıvtik jaǵdaıyn 95 %-ǵa jetkizý josparlanyp otyr.
