Qazaqstannyń basym bóliginde taǵy úsh kún aıaz bolady
ASTANA. QazAqparat - 25-27 qańtar aralyǵynda Qazaqstannyń basym bóliginde aıaz bolady, dep habarlaıdy «Qazgıdromet» RMK.
«Sýyq antıtsıklon aldaǵy úsh táýlikte Qazaqstannan ketpeıdi, sol sebepti Respýblıkanyń kóptegen oblystarynda aıaz áli de saqtaady. Ótken táýlikte ortalyq, ońtústik-shyǵys jáne ońtústik oblystardyń keı jerlerinde aýa temperatýrasy klımattyq normadan 3-8°S, al soltústik pen shyǵysta 10-18°S, qıyr shyǵysta 20-23°C tómen boldy», - delingen habarlamada.
Respýblıkanyń batys oblystarynda ońtústik-batys troposferalyq aýa aǵynynyń áserinen Iran men Qara teńiz aýmaǵynan jyly aýa kelip, aýa temperatýrasy 3-5°S-qa joǵarylady.
Batys pen ońtústikte 25-27 qańtarda keı jerlerde bolmashy boran men jyldamdyǵy 15-20, ekpini 23-28 m/s bolatyn jel turady.
Úsh oblysta qatty jeldiń saldarynan eskertý jarııalandy.
Qyzylorda oblysynda 24 qańtar kúndiz, 25-27 qańtarda táýlik boıy shyǵystan, soltústik-shyǵystan jel turyp, onyń jyldamdyǵy keı jerlerde 18-23, ekpini 30 m/s bolýy múmkin.
Aqtóbe oblysynda 24-i kúni kúndiz, 25 qańtarda táýlik boıy ońtústik-shyǵystan soqqan jeldiń kúshi 18-23, keı jerlerde onyń ekpini 30 m/s bolýy yqtımal.
Ońtústik Qazaqstan oblysynda 25-27 qańtar aralyǵynda soltústik-shyǵystan soqqan jeldiń kúshi keı jerlerde 18-23, ekpini 30 m/s bolady dep kútilýde.
