Qazaqstannyń basym bóliginde qarly boran soǵatyndyǵy kútilýde
ASTANA. 22 qańtar. QazAqparat - Qazaqstan aýmaǵynyń basym bóligine tsıklon jáne onymen baılanysty aýa aǵyndary áser etip, keı jerlerde qar, burqasyn jáne ekpindi jel turady.
Shyǵys Qazaqstan aýmaǵy áli de antıtsıklonnyń yqpalynda bolady, dep habarlady QR TJM baspasóz qyzmeti Qazgıdromet málimetterine silteme jasap.
Aqmola, Soltústik Qazaqstan, Qostanaı oblystarynyń keı jerlerinde qar burqasyndatyp, jyldamdyǵy sekýndyna 15-20 metrlik jel soǵady.
Jambyl, Ońtústik Qazaqstan, Mańǵystaý oblystarynyń keı jerlerinde tuman túsip, kóktaıǵaq bolady jáne ekpini sekýndyna 15-20 metrge jetetin jel turady.
Almaty oblysynyń da keı jerlerin tuman basady, al Jalańashkól aýdanynda ekpini sekýndyna 15-23, keı jerlerde 28 metrge jetetin kúshti jel saqtalady.
Qyzylorda oblysynyń keı óńirinde - tuman, burqasyn, kóktaıǵaq.
Túnde Qaraǵandy, kúndiz Shyǵys Qazaqstan oblystarynyń keı jerlerine sekýndyna 15-20 metrlik ekpindi jel soǵatyndyǵy kútilýde.
Taıaýdaǵy úsh táýlikte Qazaqstannyń basym ózenderinde (Jaıyq, Esil, Nura, Ertis jáne t.b.) qysqy rejim saqtalyp, muzdyń odan ári qalyńdaýy baıqalady. Almaty men Shyǵys Qazaqstan oblystarynyń jekelegen ózenderinde muz qatýymen baılanysty sý deńgeıiniń aýytqýy kútilýde.
