Qazaqstannyń basym bóliginde egis naýqany aıaqtalýǵa jaqyn - AShM

ASTANA. 7 maýsym. QazAqparat - Respýblıkanyń kóptegen óńirlerinde egis naýqany aıaqtalýǵa jaqyndady. Bul týraly primeminister.kz saıtyna bergen suhbatynda QR Aýyl sharýashylyǵy mınıstrliginiń sarapshysy Saǵyntaı Jumajanov málim etti.

Sarapshynyń aıtýynsha, 6 maýsymǵa deıingi jaǵdaı boıynsha dándi daqyldar 15 mln gektar aýmaqta egilgen, onyń ishinde - 13 mln gektary bıdaı. Bul belgilengen jospardyń 99 paıyzyn quraıdy. Barlyq daqyldar boıynsha egis qorytyndy kezeńde júrip jatyr. «170 myń gektarǵa dándi daqyl egý ǵana qaldy. Eki-úsh kúnde egis tolyǵymen aıaqtalady», - dedi S. Jumajanov.

Budan ózge, 10 maýsymǵa deıin júgeri, kúrish, kókónis jáne kartop egisi aıaqtalady. Dala jumystary týraly jedel málimet boıynsha, júgeri 96 myń gektar aýmaqqa, kúrish 89 myń gektarǵa, maıly daqyldar 1,9 mln gektarǵa, kartop 173 myń gektarǵa otyrǵyzylǵan. Al, kókónister men baqsha daqyldary 193,7 myń gektarǵa egilse, maqta egisi 138 myń gektardy, qyzylsha - 5,2 myń gektardy quraıdy.