Qazaqstannyń basym bóliginde 11 naýryz kúni tuman túsip, qar jaýady
ASTANA. QazAqparat - QR ІІM Tótenshe jaǵdaılar komıtetiniń saıtynda 11 naýryzǵa arnalǵan aýa raıynyń boljamy jarııalandy, dep habarlaıdy QazAqparat.
Atmosferalyq aǵymdardyń ótýine baılanysty eldiń shyǵysy, ońtústik shyǵysy men ortalyǵynda qar jaýady. Keı jerlerde tuman túsip, jel kúsheıip, tómennen burqasyndatady. Ońtústik batysta shańdy daýyl turýy múmkin.
Aqmola, Batys Qazaqstan, Aqtóbe, Qostanaı, Pavlodar, Shyǵys Qazaqstan, túnde jáne azańmen Soltústik Qazaqstan oblystarynyń keı jerlerinde tuman bolady. Qaraǵandy oblysynyń birqatar aýmaqtarynda tuman túsip, tómennen burqasyndatady.
Almaty, Jambyl oblystarynda da tuman túsip, kóktaıǵaq bolady. Ońtústik Qazaqstan oblysynyń keı jerlerinde sekýndyna 15-20 metrge deıin jel kúsheıedi. Atyraý oblysynda kúndiz jeldiń kúshi sekýndyna 15-20 metrge deıin jetedi. Mańǵystaý oblysynda qumdy daýyl kóterilip, jeldiń ekpini sekýndyna 15-20 metr bolady.
