Qazaqstannyń basym aýmaǵynyń aýa raıyna áli de bolsa antıtsıklon yqpal etedi
ASTANA. 10 tamyz. QazAqparat - Qazaqstannyń basym aýmaǵynyń aýa raıyna áli de bolsa antıtsıklon yqpal etedi. Tek respýblıkanyń ońtústik, ońtústik-shyǵys jáne shyǵys bóliginde aýa aǵyndarynyń júrýine baılanysty jańbyr jaýyp, naızaǵaı oınaıdy, ekpindete jel soǵady,
dep habarlady QR TJM baspasóz qyzmeti Qazgıdromet málimetterine silteme jasap.
Almaty, Jambyl, Qyzylorda, kúndiz Shyǵys Qazaqstan oblystarynyń keı jerlerinde jel ekpini sekýndyna 15-22 metrge jetedi. Ońtústik Qazaqstan oblysynda jel qýaty sekýndyna 15-20 metrge jetip, shań boraıdy. Atyraý, Aqtóbe jáne Batys Qazaqstan oblysynyń keı jerlerinde aptap ystyq saqtalady. Respýblıkanyń batysynda, ońtústigi men ońtústik-shyǵysynda óte joǵary órt qaýpi saqtalady.
Taıaý táýlikte respýblıkanyń ońtústik, ońtústik-shyǵys jáne shyǵys taý ózenderinde sý deńgeıiniń aýytqýy baıqalady.
