Qazaqstannyń basym aýmaǵyna atmosferalyq aǵymdar áser etip, jaýyn-shashyn, naızaǵaı jáne kúshti jel turady dep kútilýde - Qazgıdromet

ASTANA. 21 mamyr. QazAqparat - «Qazgıdromettiń» boljaýynsha, búgin Qazaqstannyń basym aýmaǵyna atmosferalyq aǵymdar áser etedi, onymen jaýyn-shashyn, naızaǵaı jáne kúshti jel turady dep kútilýde. Respýblıkanyń shyǵysynda keı jerlerde burshaq jaýyp, shańdy daýyl kóteriledi. Qazaqstannyń tek batys bóligi antıtsıklon taramdarynyń yqpalynda bolmaq.

Atap aıtqanda, Aqmola, Soltústik Qazaqstan, Pavlodar, Almaty, kúndiz Qaraǵandy oblystarynyń jekelegen aýmaqtarynda sekýndyna 15-20 metr jyldamdyqtaǵy kúshti jel soǵady.

Aqtóbe oblysynyń keı óńirlerinde tuman boljansa, Shyǵys Qazaqstan oblysynyń jekelegen jerlerinde burshaq, shańdy daýyl jáne sekýndyna 15-20 metr ekpindegi jel kútilýde.

Al gıdrometeorologııalyq boljamdarǵa sáıkes, 21-23 mamyr aralyǵynda Almaty, Jambyl, Ońústik Qazaqstan jáne Shyǵys Qazaqstan oblystarynyń taýly ózenderinden sý deńgeıiniń aýytqýy baıqalady. Qazaqstannyń basqa sýly nysandarynda aıtarlyqtaı óqzgerister bolmaıdy.