Qazaqstannyń basym aýmaǵy antıtsıklonnyń yqpalynda bolady, qatty ystyqtar saqtalady
ASTANA. 16 shilde. QazAqparat - QR Qorshaǵan ortany qorǵaý mınıstrliginiń «Qazgıdromet» RMK boljaýynsha, Aqmola oblysynda 16-18 shilde aralyǵynda +34+39 gradýs ystyq saqtalady.
Qazaqstannyń basym aýmaǵy antıtsıklonnyń yqpalynda bolady, kún raıy jaýyn-shashynsyz jáne ystyq bolady dep kútilýde.
Atap aıtqanda, Ońtústik Qazaqstan oblysynda keı jerlerde qumdy daýyl turyp, kúndiz 15-20 m/s-qa deıin jel kúsheıedi. Aqmola, Soltústik Qazaqstan, Pavlodar, Qostanaı, Mańǵystaý, Qyzylorda, keı jerlerde Ońtústik Qazaqstan oblystarynda kúnniń qatty ysýy saqtalady.
Atyraý, Batys Qazaqstan, Aqtóbe, Qaraǵandy oblystarynda kún qatty ysıdy dep kútilýde, keı jerlerde aptap ystyq bolady. Qyzylorda, Ońtústik Qazaqstan, Aqtóbe, keı jerlerde Jambyl oblysynda, Almaty, Qaraǵandy, Batys Qazaqstan oblystarynda tótenshe joǵary órt qaýpi saqtalady.
Aldaǵy táýlikterde Batys Altaıdyń jekelegen ózenderinde sý kóleminiń artýy baıqalady. Respýblıkanyń ońtústik jáne ońtústik-shyǵystaǵy taýly ózenderde sý deńgeıiniń aýytqýshylyǵy saqtalady.
