Qazaqstannyń baspanany jaldaý quny boıynsha álem reıtıngindegi orny anyqtaldy
NUR-SULTAN. QazAqparat – Qazaqstanda bir jyldyń ishinde abattandyrylǵan turǵyn úıdi jaldaý quny 9, abattandyrylmaǵany 4 paıyzǵa qymbattady, dep habarlaıdy QazAqparat tilshisi energyprom.kz portalyna silteme jasap.
Portal málimetinshe, 2021 jyldyń basynda Qazaqstan baspanany jaldaý quny boıynsha álem elderiniń reıtınginde 138 memlekettik ishinde 107-orynǵa turaqtaǵan. Bul jalpy elimizde jalǵa alý qunynyń arzan ekendigin bildiredi.
Reıtıng Nıý-Iorkke qaraǵanda elderdegi jalǵa alý quny qanshalyqty qymbat nemese arzan ekendigin baǵalaıdy. Bul rette Nıý-Iork ındeksi 100-ge teń. Demek, eldiń ındeksi 110 ball bolsa, onda jaldaý quny Nıý-Iorkke qaraǵanda 10 paıyz qymbat degen sóz. Al 95 paıyz bolsa, demek amerıkalyq megapolıske qaraǵanda bul elde jaldaý quny 5 paıyzǵa arzan. Qazaqstan ındeksi 9,31 paıyzdy quraıdy. Al baspana jaldaý quny eń joǵary elderdiń qatarynda Bermýd araly, Gonkong, Sıngapýr bar. Atalǵan reıtıngke sáıkes, jalǵa beriletin eń arzan baspanany Aýǵanstannan tabýǵa bolady.
2020 jyldyń jeltoqsanynda Qazaqstanda abattandyrylǵan páterdiń jaldaý quny bir sharshy metrine 1,6 myń teńgeni qurady. Bul bir jyl burynǵy kórsetkishten 9,3 paıyzǵa qymbat. Іri qalalar men megapolıster arasynda elordada páterdiń bir sharshy metriniń jaldaý quny 2,9 myń, Almatyda 2,3 myń, Aqtaýda 2 myń teńge. Eń tómeni Semeı qalasynda tirkelgen. Bul qalada bir sharshy metr 1,2 myń teńgeni quraıdy.
Al abattandyrylmaǵan baspananyń jaldaý quny ortasha eseppen sharshy metrine 848 teńge, ıaǵnı bir jyl burynǵy kórsetkishten 3,5 paıyzǵa qymbat. Mundaı baspanalardy jaldaý Almaty men Nur-Sultan qalasynda sharshy metrine 1,6 myń teńge bolady. Al Taldyqorǵan qalasynda abattandyrylmaǵan páterdiń sharshy metrin 1,1 myń teńgege jaldaýǵa múmkindik bar.
