Qazaqstannyń baspana naryǵynda básekelestik tıisti deńgeıde emes - QR Ulttyq ekonomıka mınıstrligi
ASTANA. QazAqparat - Qazaqstannyń kóptegen óńirlerinde baspana naryǵynda básekelestik álsiz deńgeıde. Bul týraly «QazAqparat» HAA resmı saýalyna QR Ulttyq ekonomıka mınıstrliginen osylaı málim etti.
Vedomstvonyń derekterine qaraǵanda, turǵyn úı naryǵyna júrgizilgen (Básekelestikti qorǵaý komıteti júrgizgen) taldaýǵa qaraǵanda, elimizdiń kóptegen óńirlerinde baspana qurylysy naryǵy damymaǵan básekelestik ortamen baıqalyp otyr. Bul jerlerde negizgi oıynshylar naryqta ıemdenip otyrǵan jaǵdaıynyń arqasynda turǵyn úı qurylysynyń kólemin jáne onyń baǵasyn ózderi aıqyndaıdy.
Vedomstvo Astanadaǵy baspana qunynyń deńgeıi joǵary ekenin de moıyndap otyr. Osy oraıda olar QR Úkimeti elordadaǵy turǵyn úı baǵasyn ońtaılandyrý boıynsha keshendi jospardy qabyldaǵanyn eske salyp ótti.
Keshendi jospardy júzege asyrý aıasynda qurylysqa ruqsat berý rásimderi men qurylysqa jer telimin bólý sharalaryn jeńildetý, úlestik qurylys tetikterin jetildirý, naryqtyń qurylys materıaldarymen qamtamasyz etilýin nazarda ustaý jáne basqa da máseleler eskerilgen.
Munymen qosa, mınıstrlik bıyl baspana naryǵynda qurylys kompanııalary arasynda baǵany ózara ymyralasyp kelisý turǵysynda monopolııaǵa qarsy zańnamany buzýshylyqqa tekserý júrgizilmegenin habarlady.
