Qazaqstannyń básekege qabiletti 30 eldiń qataryna kirýi ǵylymı qamtymdy ekonomıkany qalyptastyrýǵa negizdelýi tıis - Q.Toqaev
ASTANA. QazAqparat - Qazaqstannyń básekege qabiletti 30 eldiń qataryna kirýi ǵylymı qamtymdy ekonomıkany qalyptastyrýǵa negizdelýi tıis. Bul týraly búgin QR Parlamenti Senatynyń Tóraǵasy Qasym-Jomart Toqaev aıtty.
«Elimizdiń básekege qabiletti 30 eldiń qataryna kirýi ǵylymı qamtymdy ekonomıkany qalyptastyrýǵa negizdelýi tıis. Bul ustanym ekonomıkanyń shıkizattyq túrinen ınnovatsııalyq úlgisine kóshýdi qamtamasyz etýge zor múmkinshilik týǵyzatyndyǵy sózsiz. Muny ǵylymı qamtymdy ekonomıkany qalyptastyrý arqyly turaqty ekonomıkalyq damýǵa qol jetkizgen elderdiń tájirıbesi de anyq kórsetip otyr», - dedi Q.Toqaev QR Parlamenti Senaty «Óńir» depýtattyq tobynyń «Bilim, ǵylym jáne kásipkerliktiń seriktestigi - ulttyq ınnovatsııalyq júıeniń jáne ǵylymǵa negizdelgen ekonomıkanyń strategııalyq damý joly» taqyrybyna arnalǵan otyrysynda.
Senat spıkeriniń atap ótýinshe, ǵylymı qamtymdy ekonomıkada eńbek ónimdiliginiń joǵary deńgeıine mán berilip, ekonomıkalyq ósimdi qamtamasyz etýde ǵylymı zertteýler men ozyq tehnologııalyq sektorlardyń jumysyna basymdyq beriletini belgili. Naqty aıtqanda, ınnovatsııalyq ekonomıkanyń negizgi belgilerine sapaly bilim men ǵylym, básekelestikpen keń óris alǵan kásipkerlik, ınnovatsııaǵa degen udaıy suranys, eńbek ónimdiligi men turmystyń joǵary deńgeıi jáne álemdik aýqymdaǵy básekege qabiletti ekonomıka jatady.
Qazirgi tańda ulttyq ınnovatsııalyq júıeni damytý boıynsha memlekettiń, bıznestiń, bilim jáne ǵylymı júıesiniń ózara baılanysy arqyly jańa múmkindikter usynylýda ekendigin basa aıtqan Senat Tóraǵasy: «Búginde Qazaqstannyń birqatar jahandyq-ekonomıkalyq syn-qaterlerdiń aldynda turǵany belgili. Sondyqtan memleketimizdiń damý keleshegi, onyń básekege qabiletti damyǵan elderdiń qataryna kirýi jáne jahandyq ınnovatsııalyq júıede laıyqty oryn ıelenýi elimizdiń synı kezeńderdi tabysty eńserýine tikeleı baılanysty bolatyny daýsyz. Bul rette Qazaqstan úshin álemdegi eń ozyq tehnologııalyq ózgerister ortasynda bolyp, ınnovatsııalyq turǵydan belsendi elderdiń qataryna kirýi úshin qolda bar ǵylymı-tehnologııalyq jáne kadrlyq áleýetti tıimdi paıdalanýdyń mańyzy zor bolmaq», - dedi.
