Qazaqstannyń Bas sanıtarlyq dárigerin densaýlyq saqtaý vıtse-mınıstri etý usynyldy
Onyń aıtýynsha, búginde kásipkerlerge júrgiziletin sanıtarlyq-epıdemıologııalyq tekseristerdiń sany az emes. Alaıda, kásipkerler tarapynan ol talaptardy oryndaý jaǵy áli de aqsap tur. Tekserister kezinde qatań jazalaý sharalary jıi qoldanylady. Al, aldyn alý jumystary júrgizilmeıdi, júıe joq. Sonyń birden-bir sebebi - sanıtarlyq-epıdemıologııalyq qyzmettiń durys jolǵa qoıylmaýy, bir mınıstrlikten ekinshi mınıstrlikke qaıta-qaıta aýystyrylýy.
"Buryn sanıtarlyq-epıdemıologııalyq qyzmet densaýlyq saqtaý salasynda "prokýratýra" sııaqty bolǵan. Al bizdegi reformalardyń nátıjesinde ol basqa bir memlekettik organǵa kiriptar bolyp qaldy. Sondyqtan búginde sanıtarlyq-epıdemıologııalyq qyzmetti Densaýlyq saqtaý mınıstrligine aýystyryp qana qoımaı, atalǵan qyzmettiń basshysyn mınıstrdiń orynbasaryna deıin kóterý kerek dep oılaımyn. Ondaı tájirıbe keńester kezinde bolǵan. Sony qaıtarý qajet. Esterińizde bolsa, Qazaqstanda bas sanıtarlyq dáriger ylǵı mınıstrdiń birinshi orynbasary qyzmetin atqardy. Sol kezde atalǵan qyzmettiń abyroıy boldy. Fakýltetter jumys istedi. Medıtsınalyq ýnıversıtetter arnaıy maman oqytty. Bilýimshe, qazir ondaı mamandyq joq. Sonyń saldarynan sanıtarlyq-epıdemıologııalyq qyzmetke kásibı biliktiligi tómen mamandar keledi. Tipti, medıtsınalyq mamandyǵy joq adamdar bar. Al olardyń ne úshin kelip júrgeni aıtpasa da túsinikti", - dedi Súleımenov Bas prokýratýrada ótken keńestiń búgingi otyrysynda.
Aıta keteıik, búginde sanıtarlyq-epıdemıologııalyq qyzmet QR Ulttyq ekonomıka mınıstrliginiń Tutynýshylar quqyqtaryn qorǵaý komıtetiniń quramyna kiredi. Bas memlekettik sanıtarlyq dáriger qyzmetin Jandarbek Bekshın atqarady.