Qazaqstannyń bas redaktorlar klýby úzdik jýrnalıstik maqalalardy anyqtady
ASTANA. 4 qańtar. QazAqparat - Búgin Astanada Qazaqstannyń bas redaktorlar klýbynyń jýrnalıster arasynda ótkizgen «Asyl sóz qudireti» atty baıqaýynyń jeńimpazdary marapattaldy.
Klýbtyń 5 jyldyǵyna arnalǵan atalmysh baıqaý «Saıasat», «Ekonomıka», «Qoǵam», «Mádenıet», «Bilim», «Sport», «Jastar» taqyryptyq atalymdary boıynsha úzdik maqalalar arasynda ótti. Sondaı-aq 21 jasqa deıingi jastarǵa arnalǵan «Qalam baıqaýy» júldesi sarapqa salyndy.
Sharanyń basty maqsaty - eldiń eń úzdik jýrnalısterin anyqtaý jáne olardyń erik-jigerin yntalandyrý. Onyń barysynda respýblıkalyq, aımaqtyq baspasóz, elektrondyq buqaralyq aqparat quraldarynan qazaq jáne orys tilderinde jalpy sany júzge jýyq materıaldardy qamtıtyn 25 tapsyrys kelip tústi. Olar qazylar alqasynyń muqııat saraptamasynan ótti.
Komıssııa qortyndysynda, tıisti atalymdar boıynsha 9 jeńimpaz anyqtaldy. Olardyń arasynda «Aıqyn» gazetiniń bas redaktory Nurtóre Júsip, «Qazaqstan» RTRK telearnasynyń redaktor-júrgizýshisi Qanat Áýesbaı, «Ádilet BAQ medıa» gazeti bas redaktorynyń orynbasary Muratbek Toqtaǵazın, «Elarna» telearnasynyń «ıA verıý.kz» baǵdarlamasynyń júrgizýshisi Azamat Aldońǵarov, «7 arna» telearnasynyń menshikti tilshisi Olga Vıtýkevıch, oblystyq «Aqtóbe» gazetiniń qyzmetkeri Aıgúl Jubanysh, «Shalqar» radıosynyń sholýshysy Quralaı Jumahanova, «Zań» gazetiniń qyzmetkeri Elgúl Nuǵmanova bar. L.N.Gýmılev atyndaǵy Eýrazııa ulttyq ýnıversıtetiniń «Jýrnalıstıka jáne saıasattaný» fakýltetiniń stýdenti Symbat Moldataı 21 jasqa deıingi jastarǵa arnalǵan «Qalam baıqaýy» júldesiniń ıegeri atandy.
«Qazaqstannyń bas redaktorlar klýby qurylǵaly beri eleýli isterdi tyndyrdy. Sonyń biri - elde alǵash ret Jýrnalıst etıkasy kodeksiniń qabyldanýy. Endi búgin biz klýbtyń uıymdastyrýymen tamasha shara - «Asyl sóz qudireti» atty baıqaýynyń qorytyndysyn shyǵaryp otyrmyz. Bul baıqaý jýrnalıst atty zeıneti men beıneti mol maman ıesine oqyrman men sarapshylar tarapynan berilgen úlken baǵa», - dedi QR Mádenıet jáne aqparat vıtse-mınıstri Arman Qyryqbaev saltanatty marapattaý sharasy barysynda.
Qazaqstannyń bas redaktorlar klýby 2007 jyly qoǵamdyq birlestik retinde resmı tirkelip, óz jumysyn bastaǵan bolatyn. Osy bes jyl ishinde Klýb san jaǵynan da, sapa turǵysynan da ósip, edáýir jetistikterge qol jetkize bilgen. Búgingi tańda ol 213 respýblıkalyq jáne aımaqtyq BAQ bas redaktorlaryn biriktiretin, quramynda 5 aımaqtyq bólimsheleri bar bedeldi uıymnyń birine aınalyp otyr.
