Qazaqstannyń Bas múftıi Mysyrdaǵy Beıbarys baba meshitinde boldy
Dinı basqarma delegatsııasy tarıhı ǵımaratty qaıta jóndeý jumystarymen tanysty. Bul jaıynda Qazaqstan musylmandary dinı basqarmasynyń baspasóz qyzmetinen habarlady.
«Mysyrǵa qul bolyp kelip, sultandyq dárejege deıin kóterilgen atamyz meshitter men medreselerdiń boı kóterýine, bilim men ǵylymnyń qanat jaıýyna kóp úles qosty. Babamyz Mysyrdyń ámirshisi bolǵan tusta munda turaqtylyq ornady. Ol halyqqa jaqyn bolyp, alym-salyqty azaıtqan jáne túrmedegi tutqyndardyń denin bosatqan. Kaırdegi ál-Azhar meshitin qaıta qalpyna keltirip, irgeli oqý ordasyna aınaldyrǵan - bizdiń Beıbarys babamyz. Mysyr men Sham elinde kóptegen medreseler saldy. Sonyń biri «Zahırı medresesi» atty oqý orny Kaırde áli kúnge deıin bar. Medreselerdiń ishinde mol kitap qory bar kitaphanalar da jumys istedi. Qalada Zahır Beıbarys Jamı dep atalatyn úlken meshit saldyrǵan. Osy qulshylyq úıi ornalasqan aýmaq áli kúnge deıin az-Zahırııa dep atalady. Beıbarys zamanynda salynǵan ǵımarattar áli kúnge deıin Kaır qalasynyń sánin keltirip tur», - dedi Erjan qajy Malǵajyuly.
Áıgili ámirshi Sultan Beıbarys meshit turǵyzý barysynda qulshylyq úıiniń mańdaıshasyna qazaqy oıýdy órnektep salýdy umytpapty.
