Qazaqstannyń Bas múftıi Baký sammıtine qatysýda
Osymen ekinshi ret uıymdastyrylǵan halyqaralyq jıynǵa Qazaqstan musylmandary dinı basqarmasynyń tóraǵasy, Bas múftı Serikbaı qajy Oraz bastaǵan delegatsııa qatysýda, dep habarlaıdy QazAqparat tilshisi.
Qazaqstan musylmandary dinı basqarmasynyń baspasóz qyzmeti taratqan aqparatqa sáıkes, Ázerbaıjan prezıdenti Ilham Álıev ashqan sammıtte jahandyq álemde mádenıetaralyq dıalogty nyǵaıtý, din lıderleri terrorızmge, agressııaǵa, ıslamofobııaǵa qarsy, áıel, bala, jastar quqyǵyn qorǵaý, álemdik dinı tatýlyqty nyǵaıtýda din qaıratkerleriniń róli syndy taqyryp boıynsha máseleler talqylanýda.
«Bas múftı Serikbaı qajy Satybaldyuly sapar aıasynda Kavkaz musylmandary dinı basqarmasynyń tóraǵasy, sheıh Allashúkir Pashazademen, Túrkııa din isteri basqarmasynyń tóraǵasy Álı Erbashpen, Reseı Federatsııasy musylmandary dinı basqarmasynyń tóraǵasy, sheıh Ravıl Ǵaınýtdınmen, Reseı Ortalyq musylmandary dinı basqarmasynyń tóraǵasy Talǵat Tájýıtdınmen, Ózbekstan múftıi Osmanhan Álimovpen, Qyrǵyzstan múftıi Maqsatbek qajy Toqtomýshovpen kezdesip, ekijaqty yntymaqtastyq, ózara kelisim, ortaq maqsattardy júzege asyrý týraly pikir almasty», - dep atap ótedi basqarmadan.
Aıta keteıik, Bakýdegi halyqaralyq sammıtke álemniń 70 elinen kelgen din lıderleri, halyqaralyq uıymdardyń jetekshileri men ókilderi qatysýda. Sammıt sońynda Baký deklaratsııasy qabyldanbaq.
