Qazaqstannyń Bas múftıi azamattarymyzdy ortaq ymyraǵa shaqyrdy
«Jambyl oblysy Masanchı aýylyndaǵy keleńsiz jaǵdaı bizdi de alańdatyp otyr. Musylman balasynyń máseleniń anyq-qanyǵyn bilmesten, daýǵa aralasyp, óz baýyryna zalal tıgizýi durys emes. Azamattarymyzdy ortaq ymyraǵa shaqyramyz. Jekelegen adamnyń ózara kelispeýshiligi buqaralyq sıpat alyp ketpeýi kerek dep oılaımyz. Óıtkeni, ardaqty paıǵambarymyz Muhammed (oǵan Allanyń salaýaty men sálemi bolsyn) musylman úmbeti jaqsy ister úshin ǵana jınalatynyn ósıet etken. Paıǵambar jolyn ustanǵan musylman mundaı amalǵa áste barmaıtyny belgili»,- dedi Qazaqstannyń Bas múftıi.
Qazaqstan musylmandary dinı basqarmasynyń tóraǵasy sabyrǵa kelýi jaqsylyqqa aparatyndyǵyn basa aıtty.
«Baıqamastan ózge baýyrymyzǵa qııanat jasap qoıýdan saq bolǵanymyz qaıyrly. Alaýyzdyqtan abaı bolǵanymyz abzal. Qoǵamdaǵy tynyshtyq árqaısymyzdyń otbasymyz úshin asa mańyzdy qundylyq ekeni málim. Bizdiń halqymyz úshin birlik pen beıbitshilik qashan da basty baılyq sanalǵan. Memleketimizdiń ıgi bastamalary da elimizdegi birlikti qamtamasyz etýge, ulttar men dinder arasyndaǵy ózara tatýlyqty nyǵaıtýǵa baǵyttalǵan. Alla Taǵala halqymyzdyń birligi men bereketin, beıbitshiligi men amandyǵyn arttyrǵaı», - dedi Naýryzbaı qajy Taǵanuly.
