Qazaqstannyń Bas múftıi aldaǵy qasıetti Ramazan aıynaa oraı ısi musylman halqyna Úndeý joldady
ASTANA. 7 shilde. QazAqparat /Gúlmıra Álıakparova/ - Qazaqstannyń Bas múftıi aldaǵy qasıetti Ramazan aıynda kásipkerlerdi azyq-túlik taýarlaryna 10 paıyz jeńildikter jasaýǵa, dúkenderde ishkilik sýsyndardy satpaýǵa, al musylman halqyn haram áreketterden aýlaq bolýǵa shaqyrdy.
Qazaqstan Musylmandary dinı basqarmasynyń (QMDB) jáne Orta Azııa múftıleri keńesiniń tóraǵasy, bas múftı Ábsattar qajy Derbisáli aldaǵy tamyz aıynyń 1-i kúni bastalatyn qasıetti Ramazan aıynyń aldynda mınıstrler men vedomstvolar jetekshilerine, oblys, qala, aýdan basshylaryna, kásipkerlerge jáne ısi musylman jalpy halyqqa arnap QMDB-nyń derbes saıtyna (www.muftyat.kz ) óziniń Úndeýin ornalastyrdy.
«Meıirimdi, rahymdy Allanyń atymen bastaımyn. Qurmetti musylmandar, otandastar. Bıyl - súıikti Otanymyz úshin erekshe jyl. El táýelsizdiginiń 20 jyldyǵy. Dál osy aıtýly kezeńde egemen elimiz Islam Yntymaqatastyq uıymynyń tizginin qolǵa alyp, qazaqtyń baıtaq dalasynyń uzyn-sonar tarıhy Islammen bite qaınasyp jatqandyǵyn dúıim jurtqa pash etýde. Táýelsizdigimizdi alǵannan bergi az ǵana merzim ishinde elimiz aıaǵynan tik turyp, qarqyndy damý jolyna tústi. Alla Taǵalanyń meıirim-rahymy túsip, Qazaqstan jurty mereıli 20 jyldyǵyn álem aldynda abyroımen, tolaǵaı tabys jáne bereke-birlikpen, yntymaqpen qarsy alyp otyr. Nebári jıyrma jylda ǵasyrǵa tatyrlyq orasan zor ister atqaryldy. Halyqaralyq mártebeli uıymdarǵa tóraǵalyq ettik. Munyń qaı-qaısy da elim, jerim, halqym degen árbir otandasymyzdyń maqtanysh sezimi men qýanyshyn tasytary sózsiz. Bul tabystarda keńpeıil de jomart halqymyzdyń beıbitsúıgish darhandyǵynyń úlesi mol dep bilemin. Alla Taǵaladan elimizdiń odan ári bıik belesterge sharyqtaı berýin tileımin», - delingen onda.
Á.Derbisáli, el halqyn osynaý qasıetti de, berekege toly aıda Alla razylyǵy úshin ıgilikti isterdi kóbirek jasaýǵa shaqyra otyryp, jyl saıyn Ramazan aıynyń qarsańynda dúkender men bazarlarda azyq-túlik baǵalarynyń qymbattaıtyndyǵy jaıly tilge tıek etti. Osy rette, kásipker musylman aǵaıyndy Jasaǵan ıemizdiń meıirimin tilep, azyq-túlik baǵalaryn, qonaqúıler men qoǵamdyq qyzmetterdiń aqysyn 10 paıyzǵa jeńildetýge shaqyrdy. Sondaı-aq ol, qoǵamdyq kólikterde júrý aqysy, kommýnaldyq tólemaqylar jáne telekommýnıkatsııalyq baılanys tarıfteri de osy mólsherge tómendetilse degen tilegin bildirdi.
Sonymen birge Bas múftı, qasıetti aıda Alla Taǵalanyń ashýy men qaharyn týdyratyn - araq-sharaptardan, Alla Taǵala tyıym salǵan basqa da haram is-áreketterden aýlaq bolýǵa úndedi.
«Meıramhanalar men jıyn-toılarda ishkiliktiń eshbir túri ishilmese, dúkenderde satylmasa. Sebebi, ardaqty Muhammed Paıǵambarymyzdyń (s.ǵ.s.) qudsı hadısinde Alla Taǵala ishimdik ishkendi, ishkizgendi, satqandy, satyp alǵandy sondaı-aq, ony jasap shyǵarǵandy laǵynettegen. Qasıetti Quran kárimde: «Áı, ıman keltirgender! Araq ishý, qumar oınaý, buttarǵa tabyný jáne bal ashatyn oqtar - lastyq, shaıtannyń isteri. Muratqa jetem deseńder olardan aýlaq bolyńdar», - delingen (Maıda súresi, 90-91 aıat). Bul úndeý barsha adamzat balasyna mol ryzyq berip otyrǵan Alla Taǵalanyń razylyǵyna bizdiń jurtymyz da ári qaraı bólenip, saýabyna ıe bola berý maqsatynan týyp otyr. Saýapty amaldar jasaýdyń sátin qoldan shyǵaryp almaıyq, aǵaıyn!», - dep túıindedi Á.Derbisáli.
