Qazaqstannyń bas ekology #TazaQazaqstan aktsııasyn jarııalady

NUR-SULTAN. QazAqparat – QR Ekologııa, geologııa jáne tabıǵı resýrstar mınıstri Maǵzum Myrzaǵalıev #Birge #TazaQazaqstan aktsııasyn jarııalady, dep habarlaıdy QazAqparat.

Bas ekolog óziniń Twitter paraqshasynda Nur-Sultan qalasynyń mańyndaǵy sý qoımalarynyń jaǵdaıy máz emes ekenin jazdy.

«Qalamyzdyń jaqyn mańdaǵy sý qoımalarynyń biraz jerin aralap shyqtym. Aýmaqtardyń jaǵdaıy máz emes, aınala qoqys, adamdardan qalǵan qaldyqqa toly. Aıaq alyp júrgisiz qoqys úıindileri úırenshikti qubylysqa aınalǵan. Problemany tek ákimshilik ádispen sheshý múmkin emes, qoǵamnyń birligi qajet», - deıdi ol.

Mınıstr bul problemaǵa qoǵam nazaryn aýdarý úshin #Birge #TazaQazaqstan aktsııasyn bastaıtynyn habarlady.

«Osyǵan oraı, #Birge #TazaQazaqstan ekologııalyq aktsııasy jóninde habarlaǵym keledi. 20 shildede Qoıandy sý qoımasyn tazalaýdan bastaımyz. Qorshaǵan ortanyń tazalyǵyn qalaıtyn barlyq azamattardy, qoǵam qaıratkerlerin, Úkimet músheleri men ekologııa belsendilerin birge qatysýǵa shaqyramyn», - dedi Maǵzum Myrzaǵalıev.

Keıin mınıstr aktsııaǵa atsalysý úshin qaı jerden jınalý qajettigin de kórsetti.

«Jıyn 20 shildede 8:00 ben 8:30da Trıatlon parki turaǵynynyń janynda (kirý Momyshuly men Qoshqarbaev qıylysynan) bolady. Sol jerden barlyǵymyz avtobýspen aktsııa ornyna jetetin bolamyz. Tamaq pen qajetti quraldar uıymdastyrylady. Jaqsy kóńil-kúımen kelip, ıgi iske atsalyńyzdar», - dep úndeý tastady.