Qazaqstannyń barlyq sport mektepterine jańa bozkilemder taratylady
ASTANA. QazAqparat -Qazaqstannyń barlyq aımaǵyndaǵy sport mektepteri demeýshiler esebinen arnaıy kilemdermen jabdyqtalatyn bolady, dep habarlaıdy QazAqparat QR Ulttyq Olımpıada komıtetiniń baspasóz qyzmetine silteme jasap.
Qazirgi tańda aımaqtarda jas balýandardyń kúrespen shuǵyldanýyna jaqsy jaǵdaı jasalǵan.
Jaqynda QR Grek-rım, erkin jáne áıelder kúresi federatsııasynyń prezıdenti Saýat Myńbaev pen QR Ulttyq Olımpıada komıtetiniń basshysy Tımýr Qulybaevtyń bastamasymen Qazaqstannyń barlyq aımaqtaryndaǵy sport mektepterin arnaıy kilemdermen jabdyqtaý qolǵa alyndy.
Demeýshilerdiń kómegimen atqarylyp jatqan joba kelesi jyldyń naýryz aıyna deıin jalǵasady. Federatsııanyń esebi boıynsha aldaǵy ýaqytta damý jaǵynan artta qalyp jatqan aımaqtarǵa 150-den asa kilem úlestirý josparda bar. Sonyń 43-i qazirdiń ózinde óz ıelerin tapty. Atap aıtsaq, Almaty qalasy, Soltústik jáne Batys Qazaqstan, Qaraǵandy, Ońtústik Qazaqstan oblystaryndaǵy aýdandar kilemmen qamtamasyz etildi. Naqtyraq aıtqanda, búginde Shahtınsk, Jezqazǵan, Sátbaev (Qaraǵandy oblysy) qalalarynda jáne Terekti (BQO), Syrym (Atyraý oblysy), Mamlıýt (SQO) aýdandaryndaǵy balalar men jasóspirimderge arnalǵan sport mektepterine arnaıy kilem tósenishteri jetkizildi. Aldaǵy ýaqytta Federatsııa basshylary elimizdiń basqa da aımaqtaryna qol ushyn sozyp, jas balýandardyń alańsyz jattyǵý jasaýyna jaǵdaı jasamaq.
«Kúres - elimizdegi eń tanymal sport túrleriniń biri. Sondyqtan qazirgi tańda Astana men Almaty qalalaryna jáne barlyq 14 oblysqa qarasty sport mektepterine tegin kilemder úlestirip, kúrestiń damýyna úlesimizdi qosýdamyz. Mundaı bastama Kúres federatsııasy men Sporttyq jekpe-jek jáne kúsh qoldanylatyn sport túrleri konfederatsııasy, Ulttyq Olımpıada komıtetiniń qoldaýymen júzege asyp jatyr», - dedi QR Grek-rım, erkin jáne áıelder kúresi federatsııasynyń bas hatshysy Anatolıı Voloha.
Grek-rım kúresinen Beıjiń Olımpıadasynyń kúmis júldegeri Nurbaqyt Teńizbaevtyń aıtýynsha, Federatsııanyń júrgizip jatqan mundaı is-sharasy elimizdegi kúrestiń damýyna oń yqpalyn tıgizedi.
«QR Grek-rım, erkin jáne áıelder kúresi federatsııasynyń mundaı bastama kóterip, aımaqtardaǵy kúrestiń damýyna oń yqpal jasap jatqanyna qýanyshtymyn. Bárimiz de aýylda óstik. Bolashaq chempıondardyń bári aýyldan shyqqan. Sondyqtan Federatsııa basshylarynyń shalǵaıdaǵy aýyl-aýdandarǵa kómek qolyn sozyp, sport mektepterin qajetti qural-jabdyqtarmen qamtamasyz etip jatqany óte durys», - dedi N.Teńizbaev.
Aıta keteıik, qazirgi tańda Qazaqstanda 130 myńǵa jýyq adam turaqty túrde kúres túrlerimen aınalysýda.
