Qazaqstannyń barlyq óńirlerinde soǵys ardagerlerine laıyqty qurmet kórsetilip jatyr - Ó.Ozǵanbaı

ASTANA. QazAqparat - Qazaqstannyń barlyq óńirlerinde soǵys ardagerlerine laıyqty qurmet pen kómekter kórsetilip jatyr. Búgin Aqordada QR Memlekettik hatshysy Gúlshara Ábdiqalyqovamen kezdesýi barysynda «Qazaqstan Respýblıkasynyń ardagerler uıymy» Respýblıkalyq qoǵamdyq birlestigi Ortalyq Keńesiniń tóraǵasy Ómirzaq Ozǵanbaı osylaı málim etti.

«Qazirgi tańda bizdiń respýblıkamyzda ómir súrip jatqan 5 myńǵa jýyq ardager - Jeńis soldattary bar. Olardyń ortasha jasy 90-nyń shamasynda, basym bóligi tósek tartyp jatyr. Soǵys aıaqtalǵan sátte olardyń sany 700 myńnan astam edi. Sonymen birge qazaqstandyq 500 Keńes Odaǵynyń Batyrynan jalǵyz Ivan Kosenkov qana qaldy, ol Almaty oblysynda turyp jatyr. Búgingi búkil progressıvti álem, sonyń ishinde bizdiń elimiz de osynaý mereıtoıdy laıyqty deńgeıde ótkizýge daıyndalýda», - dedi Ómirzaq Ozǵanbaı.

Sonymen qatar keńes basshysy Elbasynyń atynan barlyq ardagerlerge alǵys hattary joldanǵanyn, bul sol qarttardyń kóńiline qýanysh uıalatqanyn atap ótti.

Úkimet tarapynan da arnaıy qaýly qabyldanyp, Uly Otan soǵysynyń ardagerleri men soǵan teńestirilgen tulǵalar úshin elýden astam jeńildikter qarastyrylǵan.

«Osyndaı is-sharalardyń nátıjesinde Qazaqstannyń barlyq óńirlerinde soǵys ardagerlerine laıyqty qurmet pen kómekter kórsetilip jatyr», - dedi Ó.Ozǵanbaı.

Kezdesý barysynda Jeńistiń 70 jyldyǵyn merekeleýge daıyndyq barysyna qatysty máseleler de talqylandy.