«Qazaqstannyń barlyq óńirlerinde áskerı mektep-ınternattar ashý qajet» - senator Aqan Bıjanov
ALMATY. QazAqparat - Qazaqstannyń barlyq óńirlerinde áskerı mektep-ınternattar ashý qajet. Bul týraly búgin Almatyda Baýyrjan Momyshuly atyndaǵy respýblıkalyq áskerı mektep-ınternattyń basshylyǵymen jáne oqýshylarymen kezdesýde Qazaqstan Parlamenti Senatynyń depýtaty Aqan Bıjanov málim etti.
Onyń aıtýynsha, qazir Qazaqstannyń Qarýly Kúshteri jańa tehnologııalarmen, jańa qarý-jaraqtarmen jaraqtanyp jatyr. Al olardy ıgerý úshin bilimdi mamandar qajet.
«Bolashaq bilimdi mamandar osyndaı áskerı mektep-ınternattarda shyńdalady. Áskerı bilim júıesiniń negizi, bazasy osyndaı mektepterde qalanady. Mundaı mektepterdi Qazaqstannyń basqa óńirlerinde de ashý qajet dep oılaımyn. Sondyqtan da biz búgin osy mektep-ınternatqa kelip, oqý ornynyń jumystarymen, jaǵdaıymen jaqyn tanystyq. Kóńilimiz toldy, munda kóp ıgilikti jumystar atqarylyp jatyr eken. Bıyl bıýdjetten osy mektepke arnaıy qarajat bólindi. Munda endi kúrdeli jóndeý jumystary júrgiziledi», - dedi Aqan Bıjanov.
Aıta keteıik, Baýyrjan Momyshuly atyndaǵy Almaty respýblıkalyq áskerı mektep-ınternaty Sývorov mektepteriniń úlgisinde 1983 jyly ashylǵan bolatyn. Búginde atalmysh bilim ordasynda 449 oqýshy bilim alýda. Bıyl olardyń 217-si mektep bitirip, tańdaǵan mamandyqtary boıynsha joǵary oqý oryndaryna qujat tapsyrady.
«Eger Ulttyq biryńǵaı testini jaqsy tapsyryp, kem degende 65-70 ball jınasa áskerı joǵary oqý oryndaryna túsýlerine bolady. Sonymen qatar reseılik, túrkııalyq áskerı joǵary oqý oryndarynda da bos oryndar ashylady. Bizdiń túlekter ol úshin test tapsyrady, polıgonǵa baryp áskerı synaqtan ótedi. Onda olardyń biliktiligi, shydamdylyǵy tekseriledi. Sodan keıin sheteldik áskerı joǵary oqý oryndary osy kórsetkishterge qarap, iriktep alady. Jalpy, jyl saıyn túlekterimizdiń arasynda 70-80 bala mindetti túrde áskerı joǵary oqý oryndaryna túsedi. Bul biz úshin úlken maqtanysh», - dedi Baýyrjan Momyshuly atyndaǵy Almaty respýblıkalyq áskerı mektep-ınternat bastyǵynyń mindetin ýaqytsha atqarýshy Janat Áshimbaeva.
Esterińizge sala keteıik, mundaı mektep-ınternattar elimizde tek Almaty, Shymkent jáne Qaraǵandy qalalarynda ashylǵan. Oǵan 9 synypty bitirgen balalar qabyldanady. Talapkerler mindetti túrde aýdandyq áskerı komıssarıatta tekserýden ótip, jaramdy dep tanylsa, tıisti emtıhandar tapsyrady.
