Qazaqstannyń barlyq óńirinde kosmomonıtorıng iske qosylady
Jer resýrstaryn basqarý komıteti men jergilikti atqarýshy organdardyń Memleket basshysynyń aýyl sharýashylyǵy jerlerin tıimdi paıdalaný tapsyrmasynyń oryndalý barysy týraly alqa otyrysy ótti.
Negizgi baıandamashy - QR AShM Jer resýrstaryn basqarý komıtetiniń tóraıymy G.Bımendına Prezıdenttiń tapsyrmasyna sáıkes mınıstrlik aýyl sharýashylyǵy jeriniń kosmomonıtorıngisin engizý úshin zańnamalyq baza daıyndaǵanyn jáne paıdalanylmaıtyn jerlerge salyq mólsherlemesi 20 esege artqanyn aıtty.
Bul paıdalanylmaı jatqan jerlerdi anyqtaý protsesin edáýir jedeldetken. 2020 jyly 8 mln gektar -daı paıdalanylmaǵan alqap anyqtaldy, bul – 2016, 2017 jáne 2018 jyldary atqarylǵan jumys kórsetkishinen jarty mıllıonǵa artyq.
«Memleket basshysy Ulttyq qoǵamdyq senim keńesiniń ekinshi otyrysynda barlyq daıyndyq jumysyn aıaqtap, 2020 jyly birqatar oblysta jerdi kosmomonıtorıngileý boıynsha pılottyq joba engizýdi tapsyrdy. Atalmysh tapsyrmaǵa sáıkes kosmomonıtorıng boıynsha synaq jobasy Aqmola, Qostanaı, Shyǵys Qazaqstan jáne Mańǵystaý oblystarynda júzege asyryldy. Bul aımaqtar kezdeısoq tańdalǵan joq, sebebi dál osy aımaqtardan jer paıdalaný salasy boıynsha eń kóp shaǵym kelip túsken edi», - dedi G.Bımendına.
Onyń aıtýynsha, 4 óńirde 8,3 mln ga paıdalanylmaıtyn jer anyqtalǵan.
«Onyń ishinde 0,7 mln ga – egistik jáne 7,6 mln ga – jaıylymdyq jerler. Memlekettiń menshigine 4,2 mln. ga jer qaıtaryldy, 4,8 mln. ga jer aýyl sharýashylyǵy aınalymyna tartyldy. Bul jerdi paıdalaný men qorǵaýǵa memlekettik baqylaýdyń kúsheıtilgenin, sondaı-aq, qabyldanyp jatqan sharalardyń qatańdatylǵanyn kórsetedi», - dep tolyqtyrdy Jer resýrstaryn basqarý komıtetiniń tóraıymy.
2020 jyldyń jeltoqsanynda pılottyq joba óz jumysyn aıaqtady. Synaq sátti bolǵandyqtan, Úkimet 2021 jylǵy 1 qańtardan bastap búkil respýblıka aýmaǵynda kosmomonıtorıngti engizý týraly sheshim qabyldady.
Sonymen qatar, QR AShM aýyl sharýashylyǵy jerlerin óndiristik aınalymǵa tartý máselesin júıeli sheshý úshin eki zań jobasyn ázirlep usyndy. Olar jer qatynastaryn tsıfrlandyrý, sondaı-aq paıdalanylmaıtyn aýyl sharýashylyǵy jerlerin tekserý kezeńderi men qaıtaryp alý merzimderin 2 jyldan 1 jylǵa deıin qysqartýdy kózdeıdi.
Zańǵa engiziletin ózgerister - jer zańnamasyn jetildirýge, jer ýchaskesin berý tártibiniń rásimin jeńildetýge, jer qatynasy salasyndaǵy qyzmetterdi tsıfrlandyrý arqyly halyqtyń memleketpen ózara is-qımylyn qysqartýǵa baǵyttalǵan.
