Qazaqstannyń barlyq óńirinde koronavırýs órship barady
NUR-SULTAN. QazAqparat - Elimizdiń barlyq óńirinde COVID-19 vırýsyn juqtyrǵandar sany kúrt artqany baıqalyp otyr.
Bul týraly QR DSM Taýarlar men kórsetiletin qyzmetterdiń sapasyn jáne qaýipsizdigin baqylaý komıtetiniń resmı ókili Erjan Baıtanaev aıtty, dep habarlaıdy QazAqparat tilshisi.
«Qazaqstanda osy jyldyń 12 qarashasyndaǵy jaǵdaı boıynsha 118 491 naýqas tirkeldi. Onyń ishinde búgingi kúni 108 632 naýqas saýyǵyp shyqty. Búgingi kúni 7 941 naýqas emdelip jatyr. Ókinishke qaraı 1 899 otandasymyzdan aıyryp qaldyq. Sonymen qatar sońǵy táýlikte 587 adamnyń koronavırýsqa shaldyqqany belgili boldy», - dedi ol Ortalyq kommýnıkatsııalar qyzmetindegi baspasóz máslıhatynda.
Onyń dereginshe, osy jyldyń 1 tamyzynan bastap COVID-19 pnevmanııasyna 39 545 adam shaldyqty. Onyń ishinde 23 351 adam emdelip, saýyǵyp shyqty. Al 9 782 naýqas em qabyldaýda. 412 adam qaıtys boldy. Sońǵy táýlikte 188 adamnan pnevmonııa anyqtaldy.
«Sonymen qatar sońǵy 2 aptada elimizdiń barlyq óńirinde COVID-pen syrqattanýdyń kúrt ósýi baıqalyp otyr. Syrqattanýshylyq barlyq óńirde oryn alýda. Ótken aptamen salystyrǵanda aýrý 1,7 esege ósti. Aýrý juqtyrýdyń 45 paıyzy Shyǵys Qazaqstan oblysynda tirkeldi. Qostanaı oblysynda 4 esege ósse, Batys Qazaqstan oblysynda 3,2 esege artty. Al Pavlodar óńirinde 2,7 esege aıtarlyqtaı ósim baıqalýda. Búgingi kúni atalǵan óńirlerdiń ákimdikteri kúsheıtilgen sharalardy qabyldaýda», - dedi Erjan Baıtanaev.
