Qazaqstannyń barlyq óńirinde ekojúıe qurylady

NUR-SULTAN. QazAqparat – Elimizdiń barlyq óńirinde agroónerkásip kesheni salasyndaǵy ekojúıe qurylady. Bul týraly halyqqa esep berý kezdesýinde QR Aýyl sharýashylyǵy mınıstri Saparhan Omarov aıtty, dep habarlaıdy QazAqparat tilshisi.

«Agroónerkásip kesheni salasyndaǵy óndiris kólemin arttyrý maqsatynda búkil respýblıkada aldaǵy 5 jyldyń ishinde jalpy somasy 4,5 trln teńgeni quraıtyn 845 ınvestıtsııalyq jobany júzige asyrý josparlanǵan. Búginde atalǵan ınvestıtsııalyq jobalar óńir ákimderimen jáne ınvestorlarmen pysyqtalǵan», - dedi mınıstr.

Onyń atap ótýinshe, tıisti jol kartalary da rásimdeldi. Atalǵan qujat aıasynda Aýyl sharýashylyǵy mınıstrligi jobalardyń júzege asyrylýyna monıtorıng jasap, baqylaý júrgizip otyr. Sonymen qatar ol Memleket basshysynyń tapsyrmasyna sáıkes, et, jemis-jıdek, kókónis, astyq jáne maıly daqyldar, sút ónimderi óndirisin qamtıtyn iri ınvestıtsııalyq jobalardyń tóńireginde 7 ekojúıe qurylatyndyǵyn atap ótti.

«Bul joǵary qosylǵan quny bar qazaqstandyq sońǵy ónimdi daıyndaýǵa alatyn keminde 350 myń fermerlik jáne úı sharýashylyqtaryn shoǵyrlandyrýǵa múmkindik beredi. Óńirlerdiń erekshelikterin eskere otyryp, eldiń barlyq aımaǵynda ekojúıe qurylady», - dedi Saparhan Omarov.