Qazaqstannyń barlyq memlekettik apparatynyń qyzmetine saraptama júrgiziledi
ASTANA. QazAqparat - Barlyq memlekettik apparattaǵy basy artyq baqylaý qyzmetterin anyqtaý úshin saraptama júrgiziledi. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev aıtty, dep habarlaıdy QazAqparat.
«Ulttyq kásipkerler palatasynyń qoldaýymen endigi ýaqytta dástúrge aınalǵan Sybaılas jemqorlyqqa qarsy is-qımyl máseleleri jónindegi ekinshi respýblıkalyq kásipkerler forýmy ótýde. Atap óterligi, birinshi forýmda aıqyndalǵan mindetter oryndaldy. 800-den astam jemqorlyq táýekel anyqtalyp, memlekettik organdarǵa olardy joıý boıynsha usynystar engizildi. Onyń negizgi bóligi oryndalyp, 40-tan astam normatıvtik-quqyqtyq aktide kórinis tapty, 12-si búginde oryndaldy», - dedi agenttik basshysy Sybaılas jemqorlyqqa qarsy is-qımyl máseleleri jónindegi ekinshi respýblıkalyq kásipkerler forýmy barysynda.
Onyń aıtýynsha, osydan bir apta buryn jarııa etilgen Transparensı Interneshnldiń jemqorlyqtyń ańǵarylýy ındeksinde Qazaqstan 31 ball jınap, jemqorlyq jaılaǵan elderdiń qataryna shyqqan.
«Kórip otyrǵandaryńyzdaı az jumys istelgen joq. Biraq, álemniń qarqyndy ózgeriske ushyraýy jaǵdaıynda munan da kóp sharalardy atqarýymyz kerek. Ózgeristerge tez arada beıimdelýge múmkindik beretin jańa formatta jumysymyzdy yńǵaılaý óte mańyzdy. Bul memleket úshin de, bıznes orta úshin de birdeı ózekti jańa shyndyq talaby. Osyǵan baılanysty aǵymdaǵy jyly «Atameken» UKP-men birge birqatar shara josparlanǵan. Onyń árqaısysyn júzege asyrý bızneske qysymdy azaıtyp, naqty qorǵanysty qamtamasyz etetin bolady»», - dedi Alık Shpekbaev.
Onyń paıymynsha, kásipkerlik qyzmetin retteý máselesi elimiz úshin barynsha ózekti bolyp keldi jáne aldaǵy ýaqytta da bola bermek.
«Zańdar qabyldanady, odan keıin tolyqtyrylyp, ózgertiledi. Al problemalar keı kezde sheshilmeı qalyp jatady? Nege? Qabyldanǵan zań qanshalyqty tıimdi? Bul suraqtarǵa jaýap berýge Retteýshilik áser etý saraptamasy ádisi kómektesedi. Ony qoldaný bizdiń aǵymdaǵy jylǵa arnalǵan Jol kartamyzdyń bes mindetiniń biri retinde aıqyndalǵan. Bizge artyq baqylaý fýnktsııalaryn anyqtaý jáne bıznes protsesterdi ońtaılandyrý úshin barlyq memlekettik apparattyń qyzmetine saraptama júrgizý qajet», - dedi agenttik basshysy.
