Qazaqstannyń barlyq qalalarynda «Bolashak Books» kitap sóresi ornatylmaq
Atalmysh bastamany «Bolashaq» qaýymdastyǵy qolǵa alyp otyr. Joba aıasynda búgin Astanadaǵy «Han shatyr» saýda, oıyn-saýyq kesheninde «Bolashak Books» jobasynyń tusakeseri ótti. Uıymdastyrýshylar osyndaı tyń mazmundaǵy jobamen elimizde kitap oqý mádenıetin damytýdy kózdep otyr. Demek, kez kelgen qaladaǵy turǵyndar saýda ortalyqtaryndaǵy «Bolashak Books» shkaftarynan ózine unaǵan kitaptardy ala alady.
«Qazirgi zamanda «bilimdi myńdy jyǵady» degen maqaldyń máni erekshe bolyp tur. Kitap oqý arqyly ǵana ózimiz izdegen suraqtarǵa jaýap tabamyz. Elbasymyzdyń «Rýhanı jańǵyrý: Bolashaqqa baǵdar» maqalasyna saı qolǵa alynyp jatqan áleýmettik jobanyń mańyzy zor. Innovatsııa damyǵan zamanda kitap oqýdy umyt qaldyrmaǵan abzal. Ózim osy kitap sóresine Muhtar Áýezovtiń «Abaı joly» kitabyn alyp keldim. Qazaq tilin tez meńgergisi kelgen adam «Abaı joly» kitabyn oqyǵan jón degen oıdamyn», - deıdi «Bolashaq» qaýymdastyǵy keńesiniń tóraǵasy mindetin atqarýshy, Májilis depýtaty Baqtııar Máken. 
Qazirgi tańda Almaty, Petropavl, Oral qalalarynan myńǵa jýyq kitap jınalǵan.
