Qazaqstannyń barlyq bankterindegi jaǵdaı turaqty - Q. Kelimbetov
ALMATY. QazAqparat - Elimizdiń barlyq qarjy ınstıtýttarynda jaǵdaı birqalypty. Bul týraly búgin elimizdegi birqatar bankterge jasalǵan aqparattyq shabýylǵa baılanysty Almatyda ótken baspasóz máslıhatynda QR Ulttyq bank tóraǵasy Qaırat Kelimbetov málimdedi.
«Biz búgin on banktiń ókilderimen kezdestik. Ár bank qazirgi shekten tys suranysqa qaramastan, jetkilikti dárejede valıýta bar ekenin aıtty», - dedi Q. Kelimbetov.
Esterińizge sala keteıik, sońǵy kúnderi Qazaqstan turǵyndary kúdikti sms-habarlardy alyp, onda birqatar bankterdiń bankrottyǵy týraly aıtylǵan bolatyn.
«Bul salymshylardyń tarapynan sheteldik valıýtaǵa degen shekten tys suranysty týdyrdy. Keshe Ulttyq bank ekinshi deńgeıli banktermen birlesip, Bas prokýratýraǵa shaǵymdanyp osyndaı áreketter men arandatýshylardyń jolyn kesýdi surady. Qazir quqyq qorǵaý organdary tekserý júrgizip jatyr, sondyqtan biz jýyq arada munyń barlyǵy qalaı uıymdastyrylǵanyn biletin bolamyz», - dedi ol.
Ulttyq bank tóraǵasy Qazaqstannyń barlyq bankterindegi jaǵdaı turaqty ekenin atap ótti.
«Barlyq qazaqstandyq bankterde jetkilikti kólemde sheteldik de valıýta da, teńge de bar. Qazirgi ýaqytta qazaqstandyq bankter ózderiniń kez kelgen salymshysy depozıtterin qaıtaryp alǵysy kelgen jaǵdaıda, birinshi suranymda-aq olardyń talabyn oryndaı alatyndyǵyn kórsetti. 2009 jyly da teńge baǵamy ózgertilgen kezde salymdar jappaı qaıtarylyp alynǵan bolatyn. Keıbir salymshylar basqa bankterge aýysqan, keıbiri aqshasyn úıine alyp ketip, biraz ýaqyt sonda saqtaǵan. Mundaı jaǵdaı túrli ýaqyttarda túrli elderde bolyp turady», - dedi Q. Kelimbetov.
