Qazaqstannyń barlyq aımaqtarynda radıologııalyq monıtorıngi júrgizildi

NUR-SULTAN. QazAqparat – QR Densaýlyq saqtaý mınıstrligine qarasty «Ulttyq saraptama ortalyǵy» respýblıkanyń barlyq aımaqtarynda qorshaǵan ortadaǵy gamma-fonnyń jaǵdaıyna monıtorıng júrgizdi, dep habarlaıdy QazAqparat tilshisi.

Densaýlyq saqtaý mınıstrligi taratqan aqparatqa qaraǵanda, 2019 jylǵy 22 tamyzdaǵy jaǵdaı boıynsha, qorshaǵan ortadaǵy radıatsııalyq fon turaqty. Tabıǵı gamma fonnyń artýy, sondaı-aq atmosferalyq aýa men jaýyn-shashyn synamalarynda radıoaktıvti lastaný tirkelmegen. Gamma-sáýlelený dozasynyń qýat deńgeıi saǵatyna 0,05-0,19 mıkrozıvert (mkZv/saǵ) sheginde. Iondaýshy sáýlelený normasy - 0,30 mkZv/saǵ.

Atmosferanyń jerge jaqyn qabatynyń radıoaktıvti lastanýyna monıtorıng jıyntyq beta-belsendilikti anyqtaýǵa aýa synamalaryn irikteý, tunbalardy jáne súzgilerge shógetin shańdy jınaý, sondaı-aq gamma-sáýlesiniń ekspozıtsııalyq dozasynyń qýatyn ólsheý arqyly júrgiziledi.

Atalmysh monıtorıng Ulttyq saraptama ortalyǵynyń mańyzy bar qalalarynda, 14 oblystyq, 25 qalalyq, 157 aýdandyq bólimshelerinde júzege asyrylady.