Qazaqstannyń barlyq aımaǵynda HQO-lar iske qosyldy

NUR-SULTAN. QazAqparat - Jergilikti bılik organdarynyń sheshimimen búgin Jambyl oblysynyń, keshe Shymkent jáne Semeı qalalarynyń HQO-lary jumysyn qaıta bastady. Osylaısha, respýblıkanyń barlyq aımaǵynda halyqqa qyzmet kórsetý ortalyqtary ashyldy, dep habarlaıdy QazAqparat.

Koronavırýs pandemııasy jaǵdaıynda «Azamattarǵa arnalǵan úkimet» memlekettik korporatsııasy qyzmet alýshylardy jańa erejelerge sáıkes qabyldaı bastady.

Atap aıtqanda, azamattardyń kóptep jınalýyn jáne vırýsty juqtyrý qaýpin boldyrmaý úshin halyqqa qyzmet kórsetý ortalyǵyna barý úshin aldyn ala bron jasaý qajet. Muny egov.kz portaly, eGovKzBot2.0 (@Kenes1414Bot) telegram-boty nemese 1414 baılanys ortalyǵyna qońyraý shalý arqyly jasaýǵa bolady.

HQO ǵımarattaryna kirýshilerden qatań túrde betperde kııý talap etiledi. Qashyqtyqty saqtaý úshin 1,5-2 metr aralyǵynda arnaıy belgiler jasalǵan. Ár halyqqa qyzmet kórsetý ortalyǵynda sanıtaızerler bar.

Sonymen qatar, qazir HQO-dan onlaın túrde qoljetimsiz, tek «qaǵaz» júzinde kórsetiletin qyzmetterdi alýǵa bolady (106 qyzmet).

Elektrondy qyzmetterdi qazaqstandyqtar ári qaraıda onlaın túrde úılerinen nemese elimizde arnaıy ashylǵan 600-den astam egov buryshtarynan alýyn jalǵastyrady, tıisti qyzmetti alýǵa olarǵa 1414 baılanys ortalyǵy men vırtýaldy assıstenttiń keńes berýshileri kómektese alady. Taıaý arada osyndaı taǵy 400 egov buryshy iske qosylady. Olar oblystyq ákimdikterdiń ǵımarattarynda, saýda jáne oıyn-saýyq ortalyqtarynda, oqý oryndarynda jáne t.b. jerlerde ornalastyrylady.

Azamattardyń úsh sanaty elektrondyq qyzmetterdi burynǵydaı halyqqa qyzmet kórsetý ortalyqtarynda ala alady, bul – zeınetkerler, kópbalaly otbasy músheleri jáne múgedekter. Ár front-ofıste olar úshin jeńildik terezesi jumys isteıdi. Olar da halyqqa qyzmet kórsetý ortalyǵyna baratyn ýaqytyn aldyn ala brondaýy tıis.

Aıta ketý kerek, qyzmet kórsetýdiń jańa erejeleri tek megapolısterdiń, oblys ortalyqtarynyń jáne Semeı qalasynyń HQO-laryn qamtıdy.

Aýdan ortalyqtarynda ornalasqan HQO-lar jáne aýdandyq mańyzy bar front-ofıster burynǵydaı jumys isteıdi.