Qazaqstannyń barlyq aýmaǵynda jel kúsheıedi, keı jerlerde shań kóterilip, daýyl turady - Qazgıdromet
ASTANA. 26 qyrkúıek. QazAqparat - QR Qorshaǵan ortany qorǵaý mınıstrliginiń «Qazgıdromet» RMK málimetteri boıynsha, 27 qyrkúıekte Qazaqstan aýmaǵynyń basym bóliginde atmosferalyq aǵyndardyń ótýine baılanysty jaýyn-shashyn bolady, jel kúsheıedi, jekelegen aýdandarda naızaǵaı jarqyldaıdy dep kútilýde.
Qostanaı, Soltústik Qazaqstan, Qaraǵandy oblystarynda keı jerlerde jel 15-20 m/s-qa kúsheıedi, kúndiz jel ekpini 23 m/s-qa deıin bolady. Aqmola, Jambyl, Ońtústik Qazaqstan, Qyzylorda, Batys Qazaqstan, Aqtóbe, Shyǵys Qazaqstan oblystarynda, kúndiz Mańǵystaý, Almaty, Atyraý, Pavlodar oblystarynda keı jerlerde jel 15-22 m/s-qa kúsheıedi, Qyzylorda oblysynda shań kóterlip, daýyl turady. Atyraý oblysynda túnde jáne tańerteń keı jerlerde tuman túsedi.
Respýblıkanyń ońtústiginde, ońtústik-shyǵysynda keı jerlerde jáne ortalyǵynda joǵary órt qaýpi saqtalady.
Jaqyn táýlikterde respýblıkanyń ońtústigi, ońtústik-shyǵysy jáne shyǵysynyń taýly ózenderinde sý deńgeıiniń turaqsyzdyǵy qadaǵalanady.
