Qazaqstannyń barlyq aýmaǵynda qyrkúıektiń 6-11-si aralyǵynda 6 jasqa deıingi balalardy polıemıelıtke qarsy ımmýndaý júrgiziledi
ALMATY. Tamyzdyń 13-i. QazAqparat /Názıra Eleýhan/ - Kórshi elderde polıomıelıtpen syrqattaný boıynsha epıdemııalyq jaǵdaıdyń kúrdelenip ketýine oraı,
Qazaqstannyń barlyq aýmaǵynda qyrkúıek aıynyń 6-11-i aralyǵynda 6 jasqa deıingi balalardy polıemıelıtke qarsy qosymsha birqaıtara jappaı ımmýndaý júrgiziledi. Bul týraly búgin Almatyda ótken arnaıy baspasóz máslıhatynda QR DSM Memlekettik sanıtarlyq-epıdemıologııalyq qadaǵalaý komıtetiniń tóraǵasy, elimizdiń Bas Memlekettik sanıtarlyq dárigeri Keńes Ospanov málim etti.
Onyń aıtýynsha, polıomıelıtke qarsy vaktsınalaýdy uıymdastyrý boıynsha is-sharalar jospar boıynsha daıyndalýda. "6500 egý pýnkterinde 4200 brıgada, al, eldi mekenderden alys jatqan jerlerde kóshpeli 1200-den asa brıgada jumys isteıtin bolady. Atalmysh sharaǵa 8400 dáriger-feldsherler men 5 700-deı vaktsınatorlar tartyldy. Eń tıimdi sanalatyn vaktsına Belgııa elinen satyp alyndy, ol DDU-men sertıfıkattalǵan. Immýndaý sharasyn júrgizýge Memlekettik bıýdjetten 64 mıllıon qarajat bólindi. Qyrkúıek aıynyń 11-ne deıin 1 mıllıon 800 myń balany egý josparlanyp otyr", dedi Keńes Ospanov. Onyń aıtýynsha, vaktsınalaý egý arqyly emes, dámi tátti suıyq zatty balanyń aýzyna tamyzý arqyly júrgiziledi.
Ol sonymen qatar, ımmýndaý júrgizý boıynsha dárigerler arasynda arnaıy semınarlar, dárister, dóńgelek ústelder, túsindirý, sondaı-aq daıyndyq jattyǵý jumystary júrgizilgenin, BUU balalar qorynyń qoldaýymen 630 myń baspa materıaldary, býkletter men paraqshalar daıyndalǵanyn jetkizdi.
Keńes Ospanov asa qaýipti sanalatyn polıomıelıt múgedektikke, ólimge soqtyratyndyǵyn eskerte otyryp, barlyq ata-analardy bul sharaǵa jaýapkershilikpen qaraýǵa shaqyrdy. "Jylyna elimizdiń shekarasy boıynsha 8 mıllıon 100 myń sheteldikter ótedi. Polıomıelıt oryn alǵan Tájikstan elinen Qazaqstanǵa 25682 adam ótti. Sondyqtan bul aýrýdyń kirý qaýpi bar", dep atap ótti ol.
