Qazaqstannyń barlyq aýdan ortalyqtarynda 4G paıda bolady
Bul týraly búgin QR Aqparat jáne kommýnıkatsııalar mınıstrliginiń alqa otyrysynda vedomstvo basshysy Dáýren Abaev aıtty, dep habarlaıdy QazAqparat.
«Telekommýnıkatsııany damytýdaǵy basym mindetterdiń biri halyqtyń ınternetke keńjolaqty qoljetimdilikpen qamtamasyz etý. Búginde paıdalanýshylar sany 73 paıyzǵa jetip otyr. Bul Qazaqstannyń básekege qabilettiliktiń jahandyq reıtıngi ındeksinde 41-orynǵa turaqtaýyna múmkindik berdi. Turǵyndar sany 10 myń jáne odan da kóp aýyldyq eldi mekenderde 3G standartynyń mobıldi baılanysy engizildi. 4G standarty turǵyndar sany 50 myńnan asatyn aýyldyq eldi mekenderde qosyldy. 2017 jyldyń sońyna qaraı elimizdiń barlyq aýdan ortalyqtary 4G standartymen qamtylatyn bolady»,- dedi ol.
Sonymen birge Abaev, mınıstrlik «Qazaqtelekom» jáne «Transtelekom» kompanııalarymen birlesip, aýyldyq eldi mekenderdi ınternet jelisine keńjolaqty qoljetimdilikpen qamtamasyz etý jobasyn ázirlegendigin aıtty.
«Atalǵan jobany júzege asyrýdyń nátıjesinde 1300 aýyldyq eldi mekende jańa býyndaǵy baılanys ınfraqurylymy qurylatyn bolady. Ol aýyl mektepteriniń, aýrýhanalardyń, poshtalardyń, túrli memlekettik uıymdar men bıýdjettik mekemelerdiń joǵary jyldamdyqty ınternetke qosylýyn qamtamasyz etedi», - dedi mınıstr.
Onyń derekterine qaraǵanda, «OTAU TV» spýtnıktik habar taratý jelisi elimizdiń aýmaǵyn 100 paıyz qamtyǵan. 1 qazandaǵy málimetterge sáıkes, abonentter sany 1,2 mln. adamdy quraǵan. Osy rette Abaev atalǵan baǵyt boıynsha jobany iske asyrý jónindegi jol kartasyn bekitý, «OTAU TV» básekege qabilettiligi men kórsetilimin arttyrý jóninde usynystar engizýdi tapsyrdy.
