Qazaqstannyń bank júıesin tártipke keltirý ózekti másele - Erlan Saırov

ASTANA. QazAqparat - Qazaqstannyń bank júıesin belgili bir tártipke keltirý máselesi óte ózekti. Mundaı pikirdi QazAqparat tilshisine belgili saıasattanýshy Erlan Saırov bildirdi, dep habarlaıdy QazAqparat tilshisi.

«Qazaqstannyń bank júıesin belgili bir tártipke keltirý máselesi óte ózekti. Ipotekalyq bolsyn, áleýmettik mańyzy bar nesıeler bolsyn bankter halyqqa kómektesýge múddeli bolýy kerek», - deıdi Erlan Saırov.

Saıasattanýshynyń aıtýyna qaraǵanda, qazirgi jaǵdaı kerisinshe, bankter áleýmettiń qamyn oılaı bermeıdi. Halyq alǵan jalaqysynyń aıtarlyqtaı bóligin nesıe tóleýge berip jatqany qupııa emes.

«Bul, bizdiń halyqtyń basym kópshiliginiń búgingi tańdaǵy «taǵdyry» dep aıtýǵa bolady. Sondyqtan, meniń oıymsha, bankterdi bir retke keltirý jónindegi Elbasynyń tapsyrmasy da halyqtyń múddesine sáıkes keledi», - dedi Erlan Saırov.

Eske sala ketsek, keshe Astanada Prezıdenttiń tóraǵalyǵymen Úkimettiń keńeıtilgen otyrysy ótken edi. Otyrys barysynda Nursultan Nazarbaev bank júıesindegi búgingi ahýaldy synǵa aldy.

«Elge kelip bank quryp, jumysyn bastaıdy. Adamdar senip, aqshalaryn salady, sonymen qatar kvazımemlekettik sektor da qarjysyn salady. Keıinnen aktsıonerler qarjyny jymqyrýdy bastaıdy. Osy zańsyzdyq úshin olardy túrmege otyrǵyzýǵa zańdar joq. Olar qashqannan keıin, atalǵan adamdy izdep áýre bolamyz. Danııar, basyńmen jaýap beresiń. Qajetti zańmen qamtamasyz ettik, endi salaǵa jaýap ber. Bank jumys istep turǵanda aktsıonerler qarjyny urlamaýy tıis. Ózderiniń bankterin urlap, joq qylady», - degen edi Elbasy Ulttyq bank tóraǵasy Danııar Aqyshevke qarata aıtqan sózinde.

Memleket basshysy sondaı-aq bıznesti qoldaý úshin bólingeli otyrǵan 600 mlrd teńgeni tıimdi ıgerýdi tapsyrdy.

Keńes barysynda Ulttyq bank tóraǵasy bankterdiń jumysyn qadaǵalaýdyń jańa modelin usyndy.

Sondaı-aq onyń aıtýynsha, ótken jyly naryqtan álsiz oıynshylardy ysyrý jumysy jalǵasyn taýyp, táýekelge barý qaýpi joǵary úsh bank lıtsenzııadan aıyryldy.

«Bul bankterdi jabý protsesi shegine jetip qaldy. Qazirdiń ózinde depozıtterdi kepildendirý júıesinen tólemder júrgizilip jatyr. Bunyń bári eshqandaı bıýrokratııasyz, zańnamalyq turǵyda ári barynsha jyldam, azamattar úshin yńǵaıly jaǵdaıda júrgizilýde», - dedi Danııar Aqyshev.